Archives de
Mois : juin 2021

Sitis de conèisser

Sitis de conèisser

(Per se conectar clicar sul ligam ò sus l’imatge)

La Calandreta Aimat Serre de Nimes
https://calandretaaimatserre.wixsite.com/calandretaaimatserre

Institut d’Estudis Occitans 34
Siti oficial, ressorsas, informacions

Blòg
Escambis, mots crosats, articles
https://ieoerau34.blogspot.com/

Coriandre
Associacion culturala, cafès òc, talhièrs de lenga, de danças tradicionalas, balètis, Trad’Hivernales
Association Coriandre | Sommières | Trad’Hivernales, atelier danse trad, cafés Oc, balèti (asso-coriandre.fr)

Los Amics de la Baragonha
Associacion culturala, promocion de las tradicions (bèstias Totémicas), talhièrs de lenga
Culture | Les amis de la Baragogne | Occitanie

Institut d’Estudis Occitans 30, Marpòc
Siti oficial, ressorsas, informacions, eveniments
Accueil – IEO 30

De Fil en Veta
Blòg, articles
De fil en veta… (cercaval.blogspot.com)

Leonia, Dòna Eiriç
Animacion, Aventuras de Leonia
(3) Léonie Mme Hérisson – YouTube

Joan-Frederic BRUN
Montpelhièr l’Occitana, articles, literatura,
Montpelhièr l (jfbrun.eu)

L’Aucèu Libre
Associacion per sosténer l’edicion en Occitan o en Catalan, organisator de las rencontras literarias de Salinellés.
Qui sommes-nous ? | Éditions L’aucèu libre (lauceulibre.com)

Agenda Trad
Calendièr d’eveniments a l’entorn dels cants e de la dança
Calendrier de musique et danse folk : Languedoc-Roussillon (agendatrad.org)

Menestrès Gascons
Associacion per la promocion de las danças e musicas tradicionalas de Gasconha.
Menestrèrs Gascons (menestrersgascons.com)

Portalh del Patrimòni Oral
Catalòg d’archius sonoras
Portail du patrimoine oral (live-paas.net)

Culturas d’Òc
Associacion per la promocion de las culturas d’Òc
Culturas d’Òc musiques et danses traditionnelles – Site de Culturas d’Òc ! (culturasdoc.fr)

La Joanada

La Joanada

Sant Joan d’estiu se sarra, lo jorn lo mai long de l’annada, de òc, mas tanben un jorn qu’i es ligat un fum de cresenças e de legendas, coma la de recaptar las erbas de la Sant Joan abans que se leve lo jorn. Una de las que mai m’agrada es que per aparar los drollets de la ronha cal que se trempen dins l’aiganha lo matin de la Sant Joan.

Lo ser es lo moment de la Joanada:
Sul planòl del vilatge s’i es amolonat de gavels a bodre, lo mond son venguts e esperan en charrant. Quauques vièlhs o vièlhas son assetats sus las cadièras qu’an portadas. Es pas encara lo bon moment, es lo Joanòt que va dire. Lo clar del cèl es a mand de s’atudar, bota fuòc! Coma es dich dins lo Tresòr del Felibrige es lo moment: « Sant Joan la grana, fuòc a la cabana ».
En primièr un fuòc pichòt pels pequelets que fasèm sautar en prenent per la man. Puèi es lo grandàs, a tus a ieu cadun sauta, los calinhaires a dos se tenon per la man, se rabinan pelses e ussas. Lo quite Joanòt s’escampa per dessús lo fuòc se tenent d’una man la bereta sul cap per que casèsse pas dedins (s’es ja vist). Aquò dura tant que i a de que cremar e s’acaba per una farandòla.
Bona joanada a totes!

La Ceba de Lesinhan

La Ceba de Lesinhan

Dins Erau avèm la ceba de Lesinhan, ceba doça que comença de venir a la debuta de Junh. Dins Gard la Ceba de Vers Pont du Gard e tanben la Ceba Raioleta, ceba de serva de Cevena. Mon oncle que demorava a Lesinhan la Ceba que la fasiá venir e que l’anava vendre dins los vilatges a l’entorn a la crida de « a la ceba de Lesinhan qu’es doça coma de pan » me diguèt la seguenta:

Per far venir la ceba mai lèu e que la cabòça venga gròssa cal li plegar lo còl. Ieu lo fau pas a totas qu’ aquel plegadís ven naturalament mai tard dins la sason.

Cal far mèfi de la copar pas e de plegar docetament. Pas ges de pietat per la ceba reborsièra cal far cridar seba a la ceba (aquela podiái pas m’empachar de la far)
A lèu-lèu amics ortalièrs, se coneissètz de biaisses de far trantalhètz pas d’o mandar que lo publicarem sul blòg.

L’error

L’error

L’ Error

Tras de l’asuelh
Quand lo solelh
Fa quincanèla,
Qu’a jorn falit
Lo clar trampela,
Fan coma aimi,
Quand d’un tròç de cèl
Fa l’enfuòcaire,
D’un ser docinèl
L’embelinaire,
E de tos uèlhs
L’enluminaire.

Joan-Peire

E.O.E. 2021 : Escòla Occitana d’Estiu

E.O.E. 2021 : Escòla Occitana d’Estiu

Una setmana en immersion dins un licèu, per practicar la lenga dins la vida vidanta.
47a setmana !
Se dabanarà del 15 al 21 d’agost, a Vilanuèva d’Òlt (47).
I aurà de corses, 3 nivèls (A, B, C), 3 dialectes possibles (lengadocian, gascon, lemosin) , normal o intensiu.
Talhièrs, conferencias, seradas, contes, librariá,…

Programa e informacions sul siti :
https://eoe-oc.org/?page_id=45&lang=fr
Doas pichonas videos e de fòtos, per donar enveja :
https://www.youtube.com/watch?v=X1QI3em50-Y
https://fr-fr.facebook.com/escolaoccitanadestiu/videos/353211455629349/
lo dernièr ser, a Vilanòva/Laüsa :
https://www.youtube.com/watch?v=Wne5P6nv0Cs
https://www.youtube.com/watch?v=rpzbtdZjHVc
Se cal inscriure a l’EOE, abans lo 04/08/21 :
https://eoe-oc.org/wp-content/uploads/2021/06/BulletinEOE.pdf

Retorn sus legida : L’uèlh del lop, Daniel Pennac ; revirada Alan Roch

Retorn sus legida : L’uèlh del lop, Daniel Pennac ; revirada Alan Roch

Foguèt un bonur per ieu de poder tornar legir aquesta polida istòria, e en mai en occitan. Grandmercé a Alan Roch.

Un lop d’Alaska que torna e vira dins sa gàbia, al zòo, encontra un enfant d’Africa. Cadun dins sa solesa, cadun dins son tristum

Mas quand l’amistat se nosa, las causas se desnosan e se racontan. E quin raconte ! Cadun va poder entreveire uèlh dins uèlh, e ressentir, còr a còr, lo desrotlament de l’istòria de l’autre, al mai prigond de son unic uèlh.

Istòria d’uèlhs, d’agach, de vejaire. Dels patiments partejats, ne sortiràn mai fòrts, reconfortats, amb un agach mai agusat.

Per ieu, es una mena de conte filosofic, poetic e tanben terapeutic.

Coma o disiá lo Princeton de Sant Exupery/Princeton : « Se vei plan sonque amb lo còr. L’essencial es invisible pels uèlhs ».

Mas se sèm pessimistes, podèm conclure que l’òme es pièger qu’un lop.

Editor : Nathan (La Poësia), mas a l’ora d’ara sembla agotat. L’ai manlevat a la Mediatèca de Sant Bauseli de Montmèl ; o tornarai lèu)

De mancar pas : Leonia e Ricon lo triton (episòdi 9)

De mancar pas : Leonia e Ricon lo triton (episòdi 9)

De mancar pas : Leonia e « Ricou » lo triton (episòdi 9)

https://www.leoniemmeherisson.com/2021/05/29/leonia-e-lo-triton-9/

« Dins aqueste episòdi, Leònia rescontra un estatjant de la lavanha… Avant de tornar dormir s’arrèsta beure un còp e un dragonet sortis de l’aiga ! E òc i a de dragonets dins las lavanhas ! Bon enfin, es un triton. Li va contar cossi se passa la vida dels tritons dins la lavanha, lors amors, la mangisca, lor vida tot simplament.

Garric : la cançon occitana de uèi

Garric : la cançon occitana de uèi

Novel album de Garric : « Solidaritat »

Coma l’arbre que li dona son nom, Garric explora la musica entre las rasigas e lo cèl : espaci de vida e de creacion. Entre concèrt e musica per dançar. Podètz elegir.
Vaqui çò que ne ditz, Joan-Miquèl Poisson :
« Garric utilisa la tradicion : la lenga d’òc e qualques instruments coma : acordeon, charango, calamèl, flaüta
Solide, Garric se bota al servici de las danças tradicionalas, amb un mescladís de rigor e de malicieta.
Çaquelà las composicions d’aqueste grop inclassable son actualas. Son la sintèsi de plan d’influéncias que ligan passat e present. Composicions de las nautas ont sèm totjorn preses al jòc de l’estabosiment, a contrapè de l’inatendut.
De composicions pesugas ont la bassa de la batariá tusta sec.
De composicions requistas (come dentèla) ont lo soprano se garrolha amb l’acordeon.
De melodias que nos demòran dins lo cap portadas per un cant que va del mormolh fins a d’esclats tronadisses.
Una votz que trasmet lo messatge umanitari obstinadament.
Aqueste album novèl de Garric es la pròva talament viva que tradicion e evolucion fan un. Es aquò l’intemporalitat. » (escrich en fr. per JM Poisson ; ensag de revirada en òc per Cristina)