Pichon retorn sus la 45a UOE (Universitat Occitana d’Estiu)
Se debanèt del 10 al 13 de julhet 2021, a Nimes. Un fòrça bon programa fargat per la MARPOC e l’IEO 30. Un grand mercé als organisators : Miquèla e Patric Lapierre, Estèla Mazodier, Marineta Mazoyer, la còla dels benevòls, e totes los autres… Lo tèma aquesta annada : « Òme/animal, quinas evolucions dins las relacions ? ».
Tre la debuta, una presentacion de las vidèos del concors « Escolans» Vos presenti dos filmòts :
La 1èr : La transformacion de Cavalet/Calandreta Aimat Serre GS/CP/ Bon visionatge ! Pensi que passaretz un bon moment ! Trantalhetz pas per far de retorns, dins Comentaris, que los tornarai al regent de lor escòla. Ligam per la vidèo : Clic sus la fòto de Cavalet.
Lo 2d : « Dracon » CM Adaptacion/mesa en scèna d’aprèp lo libre : « lo filh del Drac » Ligam per la videò : Clic sus la fòto del Dracon.
Aqueste UOE ? Un programa talament ric que vos pòdi pas tot dire… Veire lo retorn sul siti de la MARPOC / https://www.ieo30.org/marpoc/
E per acabar, lo darrièr ser : Amb lo grop Canto-lou, de cants per dançar : de cercles, de borrèias, d’escotiches, de rigodons, farandòla, mazurka, rondèu, …eca, eca…
Foguèt un brave moment, per clavar la setmana dins lo cant, la musica e la jòia ! Èra agradiu de tornar trobar Joan-Noel Pelen, amb una autra casqueta. En efièch es tanben : etnològ-escrivan. Sa conferéncia de la tantossada èra : « Le rapport entre les sociétés rurales traditionnelles et le sauvage enchanté » Un bonur. Un sol regret per la conferéncia : tròp corteta !…mas la setmana tanben !
« Dins l’encastre de la manifestacion « Boulegan à l’oustal », un festenau de musicas trad, avèm rescontrat a Sant Joan de Gardonenca l’etnològ e conferencièr Joan-Nadau Pelen. Aquel especialista de la literatura orala en domèni occitan i presentèt una conferéncia sus lo subjècte seguent : « L’art ancian dau cant per la dança ai sègles XVIII e XIX en Cevenas ». Quauquei tròç de sa conferéncia, apuejats per una entrevista en lenga nòstra, vos permetràn de mièlhs comprene son trabalh etnologic. Lo tot, entre-copat de tròç filmats pendent lo « bal a la votz » prepausat per lo grop « Canto-lou », que nòstre conferencièr ne fai partida e qu’es la continuitat d’una tradicion vocala pron anciana. Un reportatge de Miquèla e Patric Lapierre. »
De qu’es aquela bestia? Pas qu’un jòc pels dròlles fargat amb una branca de sambuc. I a mantunes biaisses per dire lo sambuc: Bombardièr, la bombardela n’es lo joguet, lo colobrinièr que dona la colobrina per jogar, e solide lo garotièr que ne fasiam de drollet de peta-garòt ( o petarròt, petarina, petarra). Dins Bearn sembla que li dison escarbuta. Sai que de la fusta d’aquel arbre foguèt costuma de ne far un joguet dins Occitania tota? Per saupre çò que se pòt far d’autre amb lo sambuc de veire l’article de Florença sul blòg.
Per fargar un peta-garròt cal prene una branca que siá drecha. Copar un tròç entre dos noses, e levar la borra del mitan amb un clavel gròs o una vironeta. Puei cal fargar una quicha, pichòt baston que pòsca se mòure aisidament dintre lo peta-garòt.
Per las municions prene de micocolas, fruchas del micocolièr que li dison tanben falabreguièr, belicoquier, o forquièr ( en rason que se fasiá de forcas d’aquela fusta plegadissa coma a Sauva dins Gard vidèo sul darrièr fabricant de forcas de fusta) .
L’aire esquichat entre las doas micacolas fa gisclar la micacola dins un bruch de petador. Vaqui reviscolat del temps d’un còp èra lo peta-garòt! A vosautres de far, un concors dels mai polits es organisat per la còla d’Escambis en Òc, de mandar a escambisenòc.org e de ganhar un abonament al blòg!
La Finala Total Festum se debanèt a Sant Cristòl (34400), los 3 e 4 de julhet 2021. Malgrat la pluèja que se convidèt lo dimenge, foguèt una capitada. Per començar : lo dissabte, 3 de julhet, dins las arenas :
Castell uman amb musica
Los gigants catalans
Corsa camarguesa : Dins las arenas, lo « buòu/baragonhat », baragonha desguisada en buòu, nos faguèt passar un bon moment amb los joves « rasetaires ». N’i aviá de remirables ! Puèi, avèm desfilat fins a la cava cooperativa, amb la musica dels Baragonaïres e los tamborinaïres.
Aqui, un autre moment bèl amb lo buòu/baragonhat pel « Taureau piscine » ! Los joves avián de palmas grandassas als pès !
Miquet nos faguèt l’animacion musicala amb son carri de musica.
Castells umans dabans la cava cooperativa.
Quand la nuèch arribèt :
Los « correfocs » catalans. Los fuòcs que corren. Los grops desguisats en diables, corrisson a l’entorn del mond amb de fuòcs al cap de picas, al son de las percussions. Fan una brava petarada !
Concèrt amb Lo Condor
Grop provençau, amb de musicas que se noirissián, per aquesta serada, de racinas celtas : un bonur !
Lo lendeman, a 11 oras : la pluèja se convidèt a l’ora del maridadge !!! Donc repòrt a 3 oras ! e aqui : lo solelh !!!
D’en primièr :
Inauguracion del potz
Bertrand desvela las placas bilingüas.
Inauguracion del potz de la Baragonha : pels paires de la Baragonha, e per totes, foguèt un moment esmovent !
Desfilat musical tre lo potz fins a la cava cooperativa, pel maridadge.
Los Totems convidats, an pas pogut totes venir, en causa de la meteo… N’i a mai de 60 dins lo departament e la Region. Son los emblèmas e los protectors de la comunautat. Ne vaqui qualques uns en fotos, mas i aviá tanben lo lop, la rynchite, ….e d’autres.
l’espargue de st Christoly (33)
lo prègadieu de Cazols
Lo galejon d’Ales, amb dos « calandrons » de la calandreta de Gardons.
E ara, vaqui los nòvis : La Baragonha de sant Cristòl, e lo Tamaron de Vendargues.
La Baragonha, la futura maridada, apareis dins sa preciosa rauba de teissut blanc.
Lo futur maridat, lo Tamaron, ne sembla estabosit !
Una mena de judjament foguèt mès en plaça per respondre al curat e al conse que volián pas maridar d’animals totèmics….
La Divessa malefica
Bacchus nòstre salvador
Lo cèser, criticaire societal
La Divèssa fòrça negativa, incriminava tot lo mond, denaut del balcon, respondent a Bacchus que fin finala salvèt l’idèa de los poder maridar. Òsca a Perrine Alranc ! De moments inoblidables !
Una cançon en l’onor de Bacchus : Mercé a Clément Baudry, lo musicaire, capmestre d’una corala efemèra, mas motivada !
Fin finala, foguèron plan maridats. Cupidon amb sa sageta mandèt de còrs, fòrça polits !
Un brave mercé al Teatre de las Originas, per las idèas, pels escambis saboroses que fan petejar e respelir la lenga pel bonur de las aurelhas dels auditors.
Mas la presencia de las polidas baragonhetas es la pròva, se besonh, que los nòvis festegèron Pascas abans los Rampalms !
La serada se contunhèt amb : repais, musica e danças amb Brancaléone e Coriandre.
Un grandmercé a : Brancaléone : vengut de Tolosa, amb cabreta, accordeon, eca, eca …, per far dançar e congostar lo mond. Coriandre : Danis e sa còla, amb lor vam costumièr. Una musica embelinaire que vos fa levar e dançar…
Coriandre nos faguèt dançar : borrèias, cercles, chapeloises, rondèus, andro, mazurkas, valsas, eca, eca, … fins al cap de la serada.
Vos pòdi dire que sèm pas prèstes d’oblidar : aqueste fòrça polit maridatge !
Un pichon de quatre ans s’apròcha de son paire e li ditz : – Papa me voldriái maridar. – Te maridar, amb qui ? – Amb menina ! …Me diguèt que m’aimava e ieu l’aimi tanben, es una bona cosinièra e me conta las melhoras istòrias del mond. – Aquò es plan, mas lo problèma es que menina es ma maire e te pòdes pas maridar amb ma maire ! – E perqué ? …t’es plan maridat amb la mèuna !
Sant Joan d’estiu se sarra, lo jorn lo mai long de l’annada, de òc, mas tanben un jorn qu’i es ligat un fum de cresenças e de legendas, coma la de recaptar las erbas de la Sant Joan abans que se leve lo jorn. Una de las que mai m’agrada es que per aparar los drollets de la ronha cal que se trempen dins l’aiganha lo matin de la Sant Joan.
Lo ser es lo moment de la Joanada: Sul planòl del vilatge s’i es amolonat de gavels a bodre, lo mond son venguts e esperan en charrant. Quauques vièlhs o vièlhas son assetats sus las cadièras qu’an portadas. Es pas encara lo bon moment, es lo Joanòt que va dire. Lo clar del cèl es a mand de s’atudar, bota fuòc! Coma es dich dins lo Tresòr del Felibrige es lo moment: « Sant Joan la grana, fuòc a la cabana ». En primièr un fuòc pichòt pels pequelets que fasèm sautar en prenent per la man. Puèi es lo grandàs, a tus a ieu cadun sauta, los calinhaires a dos se tenon per la man, se rabinan pelses e ussas. Lo quite Joanòt s’escampa per dessús lo fuòc se tenent d’una man la bereta sul cap per que casèsse pas dedins (s’es ja vist). Aquò dura tant que i a de que cremar e s’acaba per una farandòla. Bona joanada a totes!
Dins Erau avèm la ceba de Lesinhan, ceba doça que comença de venir a la debuta de Junh. Dins Gard la Ceba de Vers Pont du Gard e tanben la Ceba Raioleta, ceba de serva de Cevena. Mon oncle que demorava a Lesinhan la Ceba que la fasiá venir e que l’anava vendre dins los vilatges a l’entorn a la crida de « a la ceba de Lesinhan qu’es doça coma de pan » me diguèt la seguenta:
Per far venir la ceba mai lèu e que la cabòça venga gròssa cal li plegar lo còl. Ieu lo fau pas a totas qu’ aquel plegadís ven naturalament mai tard dins la sason.
Cal far mèfi de la copar pas e de plegar docetament. Pas ges de pietat per la ceba reborsièra cal far cridar seba a la ceba (aquela podiái pas m’empachar de la far) A lèu-lèu amics ortalièrs, se coneissètz de biaisses de far trantalhètz pas d’o mandar que lo publicarem sul blòg.
Lo site utiliza los cookies per vos permetre una visita mai agradiu e vos permetre de tornar mai rapidament. En cliquetant sus "òc", acceptatz l'utilizacion de TOTES los cookies.
This website uses cookies to improve your experience while you navigate through the website. Out of these, the cookies that are categorized as necessary are stored on your browser as they are essential for the working of basic functionalities of the website. We also use third-party cookies that help us analyze and understand how you use this website. These cookies will be stored in your browser only with your consent. You also have the option to opt-out of these cookies. But opting out of some of these cookies may affect your browsing experience.
Necessary cookies are absolutely essential for the website to function properly. This category only includes cookies that ensures basic functionalities and security features of the website. These cookies do not store any personal information.
Any cookies that may not be particularly necessary for the website to function and is used specifically to collect user personal data via analytics, ads, other embedded contents are termed as non-necessary cookies. It is mandatory to procure user consent prior to running these cookies on your website.
