Gal’Art, l’Art s’es convidat dins lo vilatge
A Galargues, lo pichon Galargues, dins Erau, cada an, lo primièr dimenge de mai, se debana Gal’Art.
L’Art es benvengut dins las corts e los jardins del vilatge, que se dobrisson per aculhir artistas e òbras. Lo vilatge es tampat a la circulacion e reservat als pedons !
Ne sèm a la quatrena edicion. I a aguèt una interrupcion pendent doas annadas, en causa de la Covid » !
Es totjorn un eveniment cultural, festiu e gaujós. Ara, sèm uroses de lo tornar trobar !
Un musicaire, saxofonista, endralha lo mond dins sos passes, per vistalhar en musica…
D’autres se son marcats per practicar dins los tres talhièrs previstes : dessenh, grabadura sus carton, talhièr creatiu, e argila…
Dejós la figuièra, creacion a basa de produches naturals : plantas, flors… (las macetas que tamborrejan nos arrossegan dins un ritme plen de vam !)
En amont del projècte, i aguèt un trabalh collectiu dels escolans amb de taps de recuperacion
Es una obra collectiva de seis artistas. Faguèron, de clucons, un bocin de l’ obra, descoberta sonque lo jorn J ! Una mena de copacap, ont caduna aviá a posita, una seisena partida del trabalh artistic ! Resultat meravilhós !
Trabalh collectiu d’argila, amb la còla de Loul Combres.
I aviá 19 artistas convidats.
Dins cada cort : una polida suspresa, de descobertas, d’escambis…
Coma, per exemple, dins la cort de Patricia, un tandem de tria : Brigida que recòlta de seleccions de pichons vegetaus, de tota fòrma, de tota mena, que li agradan ; e que son metamorfosats en seguida mercé a la magia e al talent d’Alan, fotograf. Son trabalh sus las images, bota en valor, e fa caissa de retronida. Vaquí l’exposicion de l’una de lors òbras collectivas, que ne resulta :
Loul Combres :
Lo pairin de Gal’Art, aquesta annada, èra un terralier de tria : Loul Combres, que se presenta coma un : « Auteur d’argile ».
Lo fogal, ne foguèt metamorfosat !
Pel sòl, de sabla e de barcas, amb de personatges : « los migrants ».
E sus de taulas, d’umans qu’ensajan de sortir de lor gàbia : « desconfinhament »
Èra acompanhat d’un comedian per presentar sas òbras.
Dins cada luòc, numerotat*, de suspresas artisticas e d’encontres. La convivialitat es al rendez vos ! * Lo vilatge sembla un grand jòc de pista ! Plan en man, lo mond cercan los numèros dels diferents luòcs…
Aquela jornada nos dona l’escasença de tornar trobar de mond conegut del vilatge vesin, e de far de novèlas encontres.
Tre lo matin a l’acuèlh, a l’entorn d’un pichon dejunar, los artistas arriban. A mièjorn, pel picnic, nos tornam trobar, e lo ser per l’aperitiu, un moment de bonur : recampament dels artistas, dels que los aculhisson, e de la còla d’organisacion .
Òsca als organisators, e al cap mestre, (que se reconeisserà), d’aquesta jornada magica !
Un mercejament als tecnics de la Comuna que nos an fòrça plan ajudats !
A totes disèm : « Òsca ! Mercé ! E : A l’an que ven ! »
One thought on “Gal’Art, l’Art s’es convidat dins lo vilatge”
Regreti ben d’estre pas vengut mas, de Kabylia, èra un pauc luenh !