« Martror » festeja los mòrts
Un grandmercé a l’associacion : « los amics de la Baragonha », de Sant Cristòu, 34400, qu’encara un còp nos farguèron un bon biais de festejar las tradicions !
Lo divendres 28 d’octobre 2022 : Quina polida serada !
En aqueste moment, solstici d’ivèrn, se torna trobar entre vius e mòrts, (luènh d’un Halloween, òrre, fòrça tròp comercial e americanizat), es un bonaür vertadièr !
Tradicions, teatre, contes, mangisca, bon vin, e occitan foguèron pas doblidats.
Tre la debuta, lo despart, al domeni : « Cante vinha », amb lo gòt de l’amistat, per començar.
Una tombòla, a gratis, èra organizada.
Doas comedianas, Marie e Isabela, del teatre de las originas, menèron la passejada (un grop d’un centenat de personas, de tot atge, amb de desguisaments de tota mena), en direccion del bòsc.
Còrtegi animat, per se botar dins l’esperit de Martror…Pauseta prevista amb un conte teatralizat, « la mòrt mairina », e participacion del public.
De bruches prigonds dins la nuèch, al fins fons dels bòsques…per l’ambient.
A mièg percors entre las vinhas, una contaira, Cristina, èra al rendètz-vos amb un conte ont los vius encontran los mòrts, puèi se’n tornan apasimats.
Un conte que fa de ben.
Una pauseta al potz de la Baragonha ont un paure pescaire se troba perseguit per « la femna esqueleta ». Rires, plan segur, mercé a la mesa en scèna e al talent comic, de las doas comedianas. Mas es tanben un autre conte que fa soscar. Aqueste conte, legit en occitan, nos fa aprigondir lo cicle de la vida : « Vida/Mòrt/Vida ».
Es important de pas doblidar qu’aquò es lo fondament de tota vida.
Al retorn, una purèa de cogordas, plan enriquida, que nos rescaufa lo còs e lo còr.
Un gòt de bon vin, o de chuc de fruches, e sèm prestes per la seguida…
Puèi un moment fòrça cargat d’emocion : comunicacion escricha…Cadun pòt mandar un messatge a sos mòrts tant aimats. Mercé a las nòstras comedianas, « lloronas » organisatrices d’una serada de tría, los papièròts partisson en fum en direccion del cèl, fins als defunts.
« L’Apast » : E ara, los mòrts son convidats per l’apast. Tres d’entre eles arribon, que semblan sortir de delà la mòrt, mercé als maquilhatges, e desguisaments. Se pòdon assadolar abans de tornar partir en cò seu…Cadun sa plaça.
Ara es a nosautres de nos congostar amb de pomas al forn, chucosas, caudas e sucradas ! Una golardisa !
Los Amics de la Baragonha ? Una còla de jòia, d’amistat, dins l’esperit del paratge, que defend totjorn de valors prigondas.