Passejada occitana : le Duo d’Aquí
Dissabte 20 de setembre, avem fach una polida passejada teatralizada, entre cançons e scenetas, dins lo vilatge de Galargues, 34160, en companhiá de Joanda (cantaire e musicaire occitan) e de la comediana Valentine Dufloo, per una tantossada ensolelhada.
Foguèron seguits per un trentenat de personas de Galargues e d’endacòm mai.
Nos presentèron aqueste espectacle, totes dos, d’un biais bilingüe, e en interaccion, en se servissent de scenetas teatralizadas, ambe enmai cants e musica.
Subjèctes debanats :
– lo « Galhargues » d’autrescòps… fins ara, e sa plaça dins Occitania,
– los trobadors, lor filosofia, e lo fin amor,
– la convivencia, (lo ben viure amassa malgrat las nòstras diferéncias : religion, idèas, …)
– lo ròtle e la plaça de la femna dins la societat e dins lo coble.
– los Catars, lors secrets, lor filosofia, lor exterminacion, e canterem la cançon del boièr,
(An abordat la simbolica del laurièr* en cò dels catars :
– * « Le laurier est un arbre à feuilles persistantes, symbolisant la permanence, la force et la résistance de la nature. Il nous rappelle que nous sommes tous connectés à la nature et que nous pouvons tirer de l’inspiration de sa sagesse.»
Es praqu’ò que Valentina porgiguèt a cadun una fuèlha de laurièr, en disent : « lo tresaur dels catars » )
Lo Paratge (egalitat entre totes, quales que sián : son sèxe, sa religion, son atge, sas idèas, son estatut social, eca….)
- La glèisa : dins la glèisa, un jòc interactiu de questions/responsas, ambe los del public, qu’avián ja recebut de papièròts, sus la toponimia del vilatge per comprene l’importància de la lenga occitana dins la compreneson dels noms actuals de luòcs o de carrièras alentorn de Galargues.
– Aprèp la glèisa, Marcelin Albert (Valentine) nos esperava. Nos parlèt dels problèmas grèus de la viticultura en 1907.
– Retorn al fogal, per un cèrcle de convivéncia, qualques mots de mai en ligam ambe la toponimia locala, recèrca un còp de mai interactiva per far participar lo mond.
E per acabar, lo : « Se canta », amb la represa del repic per totes ; abans lo gòt de l’amistat e un pichon vespertin fòrt agradiu ambe de produches locals.
Aquesta passejada intergeneracionala, me sembla un bon biais per menar mai de mond cap a la lenga e a la compreneson del nòstre passat dins l’Occitania, la granda.
Durada : una ora…e mai. - Mercé a la Comuna, al Fogat Rural de Galargues, e al CFPPA del Departament d’Erau.
Per perlongar ambe Joanda :
Son siti :
https://joanda.fr/