Ò fant de luna, ò fant de lop, ò fant de chichorla, ne vos sètz avisats d’aquela? D’ara enlà la justicia empacharà pas cap l’utilizacion de la tilda coma dins aquel pichòt nom breton de Fañch. La cort d’apèl de Rennes o autorizèt de faire, e per encombrar pas las juridiccions, lo ministre demandèt d’abandonar las perseguidas dins aquelas garrolhas ortograficas.
Un projecte de lei, pel moment a l’espèra, foguèt estat depausat en 2025 per metre fin a aquelas discriminacions nècias. En efièch, a l’ora d’ara, son admeses dins la lei pas que los signes diacritics ( los accents) de la lenga francesa. Es aital que foguèt enebit a de parents l’emplec de ú dins lo pichòt nom occitan d’Artús ( Arthur).
Es que vòl dire que la republica se fendascla, que se dobrís una falha dins lo dògma del marme nacional?….Ò la doçament! I a molonadas de jacobins volontoses totjorn lèstes a voler pas far bolegar lo batèu, a ne galafatar prompte tota via d’aiga a, fòrt e mòrt, ne desirar pas sarpar lo fèrre. Aqueles francimandejaires nos an acostumats a d’anar e venir contraris, a d’avançadas seguidas d’enrès coma dançaires destimborlats dins una planièrada ( o dins un brande de Noimoutiers se vos agrada melhor). Quitament se nos sembla pas que d’avançadas de menudalhas, gasanh petit o afart de parpèlas d’agaça, son pichòtas victòrias e, de fial en cordura, aital benlèu se ganharà batalhas mai grandas. Pel moment se vos ven la tissa de sonar la carn de vòstra carn, l’enfanton tant aimat, la meravilheta polideta vòstra d’un Martí, d’una Cecília, d’un Peiròt, d’un Azalaís o d’un Pacòmi, trantalhetz pas de vos engulhar dins la brèca tant que dura!