Quand tornarà la Dança ? (1, a Puechabon)
Quand tornarà la dança,
A Puechabon,
Quand tornaràn los Balètis,
Amb lo gróp : Biscam pas,
http://www.biscam-pas.fr/index.php/biscam-pas
Retrobarem :
- Felip a la bodèga, a l’autbòi, lo graile,….
- Maria a l’accordeon.
- Retrobarem los talhièrs de dança, benlèu :
– Amb Renat ?
La Correnta de las Valadas occitanas italianas…
– Amb Catarina ?
Viatjarem en Israèl. Dejós los palmièrs, anarem amassa, posar l’aiga…
http://www.youtube.com/watch?v=F0HDKA3IaKs
– O d’autres animators ?
2. Lo repais partejat :
Aprèp los talhièrs : la pausa pel repais partejat !
Es agradiu de se pausar totes, a l’entorn d’una taulejada, e de partejar, la mangiscla e los mots. Vertadièra farandòla de plats salats, sucrats, que tòrnan per èsser tastats ; escambis de recèptas…un bon moment de charradissa. De botelhas, de las bonas, per acompanhar.
Puèi, pauc a chapauc, lo mond arriban, siá en grop, o per un, o per dos. Prènon un gòt o un bocin de quicòm mai, abans lo grand recapte, qu’anόncia l’ora del balèti !
3. Lo balèti :
L’autbòi de Felip, coma lo del Mèstre Albarèda de Max Roqueta, qu’èra capable de far dançar emai lo diable ; acompanhat per Maria a l’acordeon, menarà las borrèias : la crosada, la borrèia planièra, las grandas terralhas…
https://www.youtube.com/watch?v=petpQwMaeq8
Mas tanben totas menas de danças tradicionalas : polkas, cèrcles, escottishas, valsas, tarantèlas, mazurkas, rondèus, … danças d’aquí o d’endacòm mai…e mai de luènh !
http://www.biscam-pas.fr/index.php/extraits-musicaux-bal-trad
Lo mond dels talhièrs qu’an repetit pendent la tantossada, van far tot çò que pòdon per ajudar los autres a se despatolhar amb de novèlas danças. Evidentament amb fin finala, un molon de cacalasses !
E fins a mièja-nuèch seràn de mans tendudas, de sorrires, de rires partejats, lo buf de l’un, lo tocar amistós de l’autre, l’ajuda de totes, una mena de paratge dins un ambient musical, que nos liga dins una meteissa e sola pulsacion umana, ont i a la circulacion d’una energia collectiva que fa de ben.
Se cal viure tot aquò per comprene.
Qualqu’un que ne parla plan es Eric Fraj :
Lo bal, qu’es aquò ?
https://www.youtube.com/watch?v=jH8QbXdvNuk
Puèi serà ja l’ora de se desseparar, 5 oras après, de mercejar los dos musicaires e de lor demandar, :
Quand tornarem dançar a Puechabon ? (Vos desiri a totes, un meteis bonur ! E, grandmercé als nòstres dos musicaires de tria !)