Avèm ja cabussat dins l’agricultura 5.1.
D’ara enlà te fan venir d’ortalalha dins de fabricas, tal coma, pecaire, de pols o de pòrcs. Aquò se sona la « GeòPonia Rotativa ». Es a dire que te fan faire lo vira-vira a de lachugas o autres legums dins de tunèls a l’entorn d’un lum solelhós tot lo sant clame del jorn e de la nuòch.
Aqueles paurets an quitament pas l’astre de conéisser lo beluguejament de l’estelum ni tanpauc lo clar d’una lunada.
Aquò se debana pas en America o dins un autre país de baujum, non se passa en çò nòstre pròche de Rodilhan dins Gard qu’i desvolopan la tecnica. I a una fabricacion experimentala a Tarascon (lagadigadèu, la Tarasca l’aviá pas vista venir aquela mauparada).

Es verai qu’avèm d’aiga, de solelh e de terra bona, mas non los saberuts assabentats causisson pas aquela solucion tròp simpleta. Endacòm mai ont es vrai la vila rosega lo campestre te quilhan los ortets sul tech dels immòbles. Aital siáis content quand lo monta-davala marcha pas e que te cal enquilhar l’escalièr! Aquò se sona « l’Aeròponia Verticala », e ièu te sòni aquò un creba crestian!

Per ièu que siái de la vièlha, lo còp que ven quand davalarai a l’ortet per anar quèrre d’ensalada, agacharai aquelas que vegèri naisser de planton, que transplantèri al drech d’una rega, amb respècte e compassion. Tu que subrevisquères a la secada, a la gelada, a l’assaut dels limaçons atalentats, o te prometi, a l’ora de te desrabar de la tèrra mairala, de la Pacha-Mama, al moment de te far trepassar, o farai lèu de ressabuda que ne patisses pas. Bon n’i a pro de far de sentiment se que non manjarem de corrópias per pas dire de regardèlas. Al menut ensaladeta de l’ortet!
Aeròponia , aeròponia, n’as un polit morre d’aeròponia.
Cresi que de caminar atal sul cap fasèm pas que de rasonar coma de pès!