Las recèptas de cosina d’Alan (3)
LO VIN DE NOSE recèpta per 5 litres. L’estiu punta son nas !
Ingredients :
– 40 noses (noix) culhidas a la Sant Joan (lo 21 de junh) o una autra possibilitat, aquela qu’ai facha amb de fuèlhas joines de noguier !
– 5 L de vin roge de vòstra encontrada, exemple un AOP Ducat d’Uzès, Costièras de Nîmes, Còstas dau Ròse o de Provença, Minerbès, Corbièras, … de 13 o 14 gras (degrés).
– 75 cl d’aiga-ardent, un brandy per exemple
– 800 gr de sucre
– 1 teca de vanilha
– 2 pals de canèla
– 1 zèst de pèl o chuc de citron e d’irange
Copar las noses en quatre (o ciselar un cinquantenat de fuèlhas), botar totes los ingredients dins una bombona. Ben remenar coma cal per far fondre lo sucre. Daissar confir çò pus mens 45 jorns e remenar cada setmana se podètz. Colar (filtrer) e embotelhar. Beure fresc de preferéncia. Hum, un regal ! Per far un litre es encara mai aisit, dins una botelha de 1 L, botar 75 cl de vin /15 cl brandy /150 g de sucre /10 fuèlhas /canèla /vanilha /una gisclada de citron. Tot es fach !
Alain Lloria « La còla de las istòrias en òc »
One thought on “Las recèptas de cosina d’Alan (3)”
Utilisat peus mens cors per adultes ; mercés 🙂