Jòc de bolas (Jòc de ribas) :
Tèxte de Josie : Nascuda a Besièrs, visquèri a Aubais fins a l’atge de 30 ans, e après, ai viscut 30 annadas de mai, dins la region parisenca. Jogavi a un jòc que se ditz : « jòc de ribas »
Aqueste jòc es fòrça vièlh. Existís dempuèi las annadas 1830, principalament dins la region parisenca. Podètz trobar lo meteis jòc, a Ouistreham, dins Calvados.
La federacion foguèt creada dins l’annada 1933. Aquesta mameta fa 90 ans aquesta annada. Festejarem son anniversari al mes d’octobre, lo 22, dins la vila de Clichy la Garenne.
Aqueste jòc es encartat dins lo Patrimoni Culturel Immaterial (PCI) dempuèi 2016.
Los jogaires prenon tres bolas que pesan environ 1 kg caduna. Coma per la petanca, podèm jogar a un, a dos, a tres, o a quatre. I a de puntaires e de tiraires.
Las partidas se jogan en quinze punts, las finalas en vint e un punts.
Lo terren de jòc mesura trenta tres mètres de long, e quatre mètres de larg. Es planièr al mitan, amb de remontadas de cada costat de la sala, ont se dèu far d’anar e tornar.
Es fach de tèrra vegetala amb de greda embrenicada.
Cal combinar abiletat e fòrça. Cada terren es different, perque es fach per la man de l’òme. Totas las bolas a mai d’un mètre del « pichon » (bilha d’acièr de quatre cm de diamètre) son pas bonas. Las cal quitar del jòc.
La mesura se fa amb una mesura d’un mètre de long. La bola la mai prèp del pichon ganha lo punt.
Lo tiraire dèu anonciar son objectiu. Se toca pas, lo tir es pas bon. E la bola es perduda.
Totas las bolas son marquadas amb una sigla per lo cap de la còla.
Los puntaires fan rodar las bolas, los tiraires s’ajudan de las ribas per tirar.
Força règlas existisson, aquò ne fa sa beutat.
Es per aquò que torni sovent dins la region parisenca. Es per jogar
(Mercé a Josie, afogada d’aqueste jòc, (pauc conegut), per son tèxte amb las explicas.)