Dempuèi mai de dos meses, e mercé a totas las còlas de benevòls que se levan lo mafre per far espelir totes aqueles eveniments a l’entorn de l’Occitan, Total Festum Festeja! Ne vaquí lo testimoniatge de çò que se passèt al mes de Junh a Montbrun Boscatge, vilatge de Garona Nauta pròche d’Arièja. Òsca a totas e totes!

UNA QUATRENA JORNADA OCCITANA
A MONTBRUN BOSCATGE
« CANÇONS E PARAULAS DE FEMNAS »
UNA JORNADA DEDICADA A LAS FEMNAS

I aguèt las dictadas occitanas, i aguèt una edicion 2022 amb les cantaires de la primièra ora Claudi Marti e Eric Fraj, l’edicion 2023 balhèt una plaça tota particulara a las femnas.
Ongan, tota la jornada, cadun d’un biais personal rendèt omenatge a la cantaira de las annadas 70, Rosina de Peira que drobiguèt le camin a las generacions venentas e que defuntèt en 2019 dins un vilatge vesin d’Arièja.
Le 25 de junh de 2022, just a la fin de la jornada occitana, Frederic, l’occitanista engatjat dempuèi bèl temps a, aviá ja le programa de 2023 dins le cap e tre le 26 de junh de 2022 le projècte èra plan endralhat. Se caliá bolegar, que las femnas artistas son pas plan nombrosas e las cal reservar pro d’ora.
Cal dire que dempuèi la primièra edicion de la dictada, un arramat d’afogats occitans plan motivats s’èran botats a l’òbra e rebussat las margas per organizar, iniciar qualques monbruneses a l’occitan, pensar, soscar, preparar … Ongan encara tot una còla de benevòls s’èra mobilizada per fèr passar l’informacion, le programa, per convidar totas las gents que coneisson a se marcar pel repèish…

Protegir le patrimòni, protegir la « lenga nòstra », la fèr viure dins l’encastre de Total Festum mercès a l’ajuda de la region, del departament tala es la mission de l’associacion « la Maison de Montbrun » Projèctes, programas, demandas, dorsièrs, calculs.. aquò i son acostumats.
Al programa conferéncias, poesias, concèrts, cants polifonics, balèti, jòcs de fusta de « Vam e Nhac », repèish, cançons dels calandrons de la Calandreta de Pàmias…
Jòrdi Labouysse nos parlèt de qualques femnas occitanas que marquèron lor sègle, femnas de las qualas se parla pas jamès o gaireben pas. Nos contèt la vida de Gallia Placida la reina visigòta, la granda Alienor d’Aquitània, Simone Weil la filosòfa, las anonimas, las eretieras … tant d’autras, totas aquelas qu’avián les meteis drets que les òmes abans la revolucion. ..

Sortir de la gleisa per se botar tot doçament a taula tot en escotar la cantèra de Carbona. Cantèra ont se venguèron apondre totes les espectators cantaires , musicians, per acompanhar l’aperitiu, un polit moment de partatge..
Èra le moment de s’acampar jos la hala per tastar aquelas lentilhas monbrunesas a la mòda Alain Vidal, que ne fasèm la reclama dempuèi de meses !
Pensi que se’n va parlar encara longtemps d’aquelas lentilhas d’Alain que las gens se’n desbrembarián gaireben la famusa garbura montbrunesa !
Les calandrons podián pujar sus l’empont amb la Pascala de Revelhet per nos cantar qualqu’unas de lors creacions (cançons d’aquel paure Carnaval un pòc mès gaujosas que de costuma) E per clavar, l’imne occitan, le « se canta » acompanhats per totes les espectators estrambordants e uroses d’entendre aqueles maitnages manejar la « lenga nòstra ». Tot n’es pas perdut !
Èra le moment per Pascala, son grop e Agata Tinet (la dròlla foguèt pertot, tota la serada a cantar, jogar …) de nos auherir un plan polit ramelet de cançons occitanas, cançons o puslèu contes de la vida d’abans.

Una jornada plan comola, una jornada capitada, una jornada ensolelhada, una jornada a festejar la lenga occitana, cal contunhar !Le programa de l’an que ven ? Pensi qu’es ja dins le cap de Frederic e de qualques uns.
Perqué pas Jovents artistas de la  generacion novèla ?

Coco POUECH
La Maison de Montbrun