Estagi immersiu en Occitan

Estagi immersiu en Occitan

Lo sabi plan, parlar la lenga a cada moment pendent qualques jorns es un biais per melhorar son parlar. L’ai experimentat quand èri jove e qu’aprenguèri l’Anglés… E la primièra annada de la descubèrta de l’occitan. En 2020 anèri a Vila Nòva d’Òlt. Los corses intensius tota la jornada m’an pas donat l’astre de far quicòm mai qu’aprendre amb lo Bernat Vernièra. Intensiu, intensiu e aganiment… Mas una progression impressionanta. I tornèri en 2022, sonque per far los corses del matin e de talhièrs la tantossada poder participar mai a la vida sociala de la setmana.

Mas quand soi a l’ostal, malurosament i a pas grand mond que parla la lenga en çò meu, doncas i a sonque la radiò o las emissions enregistradas per practicar. Lo talhièr d’escritura d’Escambis en òc, e la lectura de las publicacions qu’i a sul net. Mas i a pas cap de charradissa.

De còps pòdi anar al «banh de lenga» mensual organizat per l’Escòla dels arts vius de Sant Ipòlit del Fòrt, una jornada a visitar un luòc o descobrir una activitat e parlar encara.

«Contes e legendas», CFPO de Besièrs

Los tres jorns per tornar a la lenga, l’estagi debuta lo dimars de matin. I a 7 estagiaris e la formatritz Alicia. La tematica es agradiva e motivanta per nos donar de qué parlar e facilitar las leiçons de gramatica indispensablas.

Lo programa de las jornadas es fòrça equilibrat, de gramatica e d’exercicis, las pausetas e lo repais. Çò que m’agrada bravament es aprendre en jogant. Lo moment qu’avèm passat a inventar un conte amb de mots a l’ecrit sus de cartas foguèt un plàser. Escambiar las cartas amb un autre grop e inventar una istòria diferenta foguèt risolièr e nos dona a veire que cadun interprèta e organiza las tematicas d’un biais diferent segon son vejaire e sa logica. Aver las meteissas cartas e fin finala racontar una istòria completament diferenta foguèt una experiéncia risolièra.

Alicia nos diguèt qu’èra son primièr estagi coma formatritz d’occitan e se pòt dire que se’n sortiguèt fòrça plan. Un dinamisme a tota espròva e una paciença remirabla.

Vos recomandi la parola

I a pas melhor biais d’aprendre que de parlar per de qu’avèm pas lo temps de cercar lo vocabulari dins lo diccionari contràriament al escrit. Per parlar, nos cal dire lèu e donc de còps utilizar de metafòras en luòc del mot just. L’important es de daissar la vergonha a la pòrta e d’o dire, de còps i a de decas, i a pas que los que fan res que ne fan pas.

Contactes

Lo programa del CFPO de Besièrs : https://www.cfpoccitan.org/estagis-e-setmaniers-langue-et-culture-occitanes/

A Aurilhac tanben i a d’estagis imersius. I anèri un còp, ailà se parla tanben un lengadocian un pauc diferent mas aisidament comprensible. Pendent aqueste estagi comprenguèri per de que dins la familha se disiá «s’en fotre» a tor de braç…
Lo programa dels estagis 2024 es pas encara en linha mas benlèu un jorn ? https://cfpo-montanhol.org/nos-stages/

2 réflexions sur « Estagi immersiu en Occitan »

  1. Per Florença /
    Amiga,
    L’Escòla d’Estiu de Vilanèva d’Òlt , per jo tanben es un endret « operacional  » per apréner la lenga , e la parlar .
     »Quan soi a l’ostal, malurosament, i a pas grand monde que parla la lenga en çò meu …  » dísetz… Jo tanben , on damòri, n’avèvi pas e n’èi pas degun per parlar ! Mès un jorn , me pensèri que non ! i a UNA persona : jo medisha.. Lavetz, adara , annadas a que me parli en occitan, tot çò qu’escrivi per la vita vitanta es en occitan : la lista de las crompas , la lista de çò de héser, tot, tot, m’ic pensi en occitan … La canhòta , li parli en occitan ( e compren tot !) e tanben las mias autas bestias . L’ostau es un pichon territòri occitan … E quitament lo monde que ne coneishen pas l’occitan, la familhòta, los amics, los vesins , los disi un, dus mots , una frasòta , un provèrbi, quan l’enveja me’n pren. Atau vivi en occitan .

    1. Merces Catarina, efectivament, lo dialogi interior pòt se passar en òc. Lo sabi plan, l’escambis d’idèas es un pauc limitat 😉 e l’argumentacion es tròp aisida quand fau de conversation soleta.
      Melhorar sa lenga es mai aisit amb de mond, n’i a totjorn un per te far descobrir quicòm.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

quinze − 10 =