Tan que farem atal

Tan que farem atal

Sabi un conte :

A Nasreddine li embarrassava un molon de calhaus davant l’ostal. Li venguèt per idèa de cavar un trauc pròche e de los i escampar dedins. Un vesin que lo fintava li demandèt trufaire de qu’anava far de la tèrra que n’aviá sortida e qu’anava l’embarrassar tornar.
Lo savi fòl li respondèt que se ne cavariá un autre trauc mai grand per li metre la tèrra dedins. Mas enfin, li faguèt lo vesin, de que me charras aquí, siás vengut piòt o de que ? Nasreddine lo rebequèt qu’atal fariá e qu’aviá pas d’i tornar!
(segon Nasreddine e los contes Occitans de Roman Deleuse)
Dins de carrièras d’Arièja baissa s’i cavan traucasses gigantasses per ne sortir de contunh arena, grava e còdols. Aquelas montanhetas baissòlas pales rebats de las cimas pirenèncas son pas per abelir lo paisatge, se’n manca ! Per carregs de camions a milierats van far la basa de l’autorota A69. Aquesta d’aquí es pas cap erotica qu’en mai del degalhatge de tèrras agricòlas e del campestre i cal menar tonas de grava d’Arièja per ne far lo fondament. Tot aquò per estalviar mens de mièja-orada de percors entre Tolosa e Castras !

De projèctes d’aquela mena per anar mai lèu, mai luènh, ne trobam mai que peis en pesca : Lo Ligam Nòrd de Montpelhièr, la linha TGV Tolosa Bordèu, lo ligam entre l’A75 e l’A9. A aquelas construccions los materiaus que li fan mestièr tomban pas de la luna, los cal tirar d’endacòm.
E ara los traucs que demòran de que ne fasèm ? Poiriam demandar a Nasreddine, qu’es pas tan piòt qu’aquò e qu’a lo rasonament lèst, se per n’escafar lo desgalhatge bastariá pas d’ i cabir a raseta los materiaus carrejats d’endacòm mai que sabèm pas de que ne far ?
Sai que nosautres que tombam pas tanpauc de la luna, pausarem la question se aquela pachaca falsament circulara risca pas de costar car a la planeta? Los encapriciats d’un progrès descabestrat nos diràn qu’aquò rai quauqu’un pagarà !
O puslèu o pagarem totes que nòstra planeta de tan li tirar atal sus la codèna per la daissar a calòs riscam pas res de la sauvar.

Non tan que farem atal, miladieus, sauvarem pas l’ostal !

Per ne saupre mai sus las carrièras de grava d’Arièja e lor impacte ecologíc de veire lo documentari prepausat per « La Télé Buissonière » basada a Foish, clicar sus ligam :
Les Eaux à vif

La Télé Buissonière, mèdia ciutadan d’Arièja, prepausa reportages e documentaris tanben en Occitan. Vos pegui çai aprèp lo ligam d’un que presi fòrça. De veire en clicar: Cercaires

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

4 + 3 =