La causida del Totèm…per sant Drezery

Lo Divendres 1^er de decembre, i aguèt un cafè Totemic, dins lo polit Mas viticòla del Mas d’Arcay prèp de Sant Drezery, e pas tròp luènh de Sussargues. Los dos vilatges soscan per trobar lor Totèm. Tota aquela soscadissa prigonda, se debanèt, a l’entorn de bons vins, e de platèus chucoses de carnsaladas e de pichons rosigatges.

A l’entorn dels cònses e dels adjunts a la cultura dels dos vilatges, lo mond occitan de la Federacion Totemica, èran aquí per ajudar a las reflexions, e benlèu tanben per se pausar las bonas questions.
De questions, ne mancavan pas !

Cossí iniciar, empusar e federar ?
Recapitulatiu de çò que foguèt fach, fins ara :  
Enquistas al prèp dels vièlhs : escais-noms dels estajants dels vilatges, legendas ancestralas, collectatges, creacions de legendas (dins los talhièrs d’escritura, que foguèron plan prolifics)
Previsions : De còlas d’artistas de tria, son prèstas per d’intervencions/musicas, danças, teatre…
Implicacion : Cossí implicar las associacions ? Las escòlas ? Los novèls estatjants e los ancians del vilatge ?
Tradicions e modernitat : Demorar dins la seguida d’una tradicion sens far arcaïc, sens oblidar la modernitat ? Es pas aisit dins los vilatges que son venguts de vilatges dormitòris
La plaça de la lenga : Respectar e far de plaça al « patés »? , o a l’occitan ? (« que ara, n’i a que dison : l’occitan, per parlar del « patés » del papeta » !)
Las subvencions : d’onte venon ? Ont demandar ? Van arribar, mas la question recurrenta del ser :  
Qué causir coma Totem ?
A l’ora d’ara, a Sant Drezery, lo Totem es en gestacion dins un uòu grandaràs. Degun sap pas çò que ne sortirà !
Espèran totes que la decision se prendrà en genièr, al moment del Forum previst.
Idèas del public present al cafè totemic :
Cal pas doblidar :
– lo Totèm, deu poder èsser desplaçat aisidament e lo caldrà albergar,
Deu contunhar de viure aprèp sa creacion, e aquò tota l’annada, doncas a cada manifestacion festiva, culturala, ont serà convidat.
– la simbolica del Totèm : es psicopòmp. Doncas, fa lo ligam entre los vius e los mòrts.
A tota sa plaça per Martror.

Conclusion : A mon vejaire, èra un cafè òc solidari, plen de vam. Cadun exprimissiá sas dificultats, sas questions, e lo grop ensajava de respondre, cadun segon son punt de vista. Escambis d’idèas, o d’experienças, ja viscudas per d’autres, qu’an ja, lor totèm.
Afar de seguir pels interessats :
Per ne saupre mai sus aqueste subjècte, e la recèrca en cors :
çai dejós, vaquí lo siti de la comuna de Sant Drézéry :
https://saintdrezery.fr/fr/nw/1458953/1288029/un-totem-vivant-pour-saint-drezery