Nadal 2023

Nadal 2023

Fòto de la grépia de Beaulieu, 34160 (Mercé a Magali)

Nadal 2023 (Tèxte de Magui)
L’odor suava de castanhas rostidas s’engulha per l’interstici de la boita de carton. Per festejar lo cap del dètz ans de la drolleta, la maire fa una afachada. Los crits risolièrs dels drollets convidats, tindan e ressonan dins la boita. Desrevelhan las petetas d’argela cuècha e pintrada.
Coma fa la tartana que s’envòla sul Larzac, cadun estira sos braces. Las cambas esposan lo sòm que las palafica. Las femnas, coma de costuma, s’auboran d’en premièr. La ninèia crida. Los anhelons cercan sa maire. Lo tamborinaire cerca son galobet. L’ase ensaja un bramadís cabretejant. Janet, lo bedigàs buta un badaràs de jòia… pecaire! Lo curat automaticament, braceja sas benediccions. Ne’n vòles, n’as ! Lo conse, que vòl far son viralenga jornalièr, s’estrangla e quequèja, çò que desrevelha la polida Arlatenca. D’instint ajusta son mocador de còl.
De l’un l’autre, d’un jorn l’autre, totas las figurinas espetan de jòia, de se tornar trobar tal parièr coma l’an passat, coma l’an davant, coma, coma….dempuèi que lo monde fa de grépias. Totas, gaujosas, s’estrambordan.
Totas ? non pas ! ne manca una, ne mancan doas, ne mancan tres. Los tres sages ! los tres reis ! E perqué vòlon pas festejar aqueste an ? Lo sabètz ? Lo conse, lo curat, lo gendarma se’n los tornan veire. Los paures òmes son de plorar, de gingolar, de se planher.
Melchorsky, lo vièlh òme, que la barba blanquineja de mai en mai, sarra una caisseta voida sota los braces. Entre dos soscas, la fa veire au conse :  » Aqueste an, nos calguèt vendre nòstre aur, d’aur de Karpats, lo present del nenon, per tornar construïr lo nòstre ostal que foguèt arroinat sota una bomba. Pòdi pas venir las mans voidas, es pas d’usatge. Soi vergonhós. Anarai pas festejar l’Epifania « .
Gaspard se lèva. Es ricament vestit d’estòfas preciosas. Lo tristum e lo pensament se legisson sus sa cara.  » Coma d’acostumada, per lo present del pichonet teniái una topina ricament decorada, comola d’encens. L’ai pas pus.
_ Per de qué ? Vos l’an raubada?
_ Non ! Fa tres meses , mon pichon tombèt dins la carrièra, badèt coma un fòl. Ma femna sortiguèt en corrent just coma una veitura de gendarmas passava. Aviá pas cargat lo carrat obligatòri alara la prenguèron. La tenguèron en preson mai d’un mès… Per la far liberar, balhèri l’encens. Sèm pas rics nosautres, los sabents. Quin malur ! Se fa pas de venir veire un nenon las mans voidas ! »
Troban Balthazar qu’èra de sonhar son camèl.  » Soi vergonhós de pas poder onorar coma se dèu lo novèl nat ! Mos dos filhs an vendut la culhida de mirra per pagar lor viatge en Euròpa. Es luènh, es car lo viatge, cal prene de batèus. Pagar los passaires còsta los uèlhs del cap. Per astre, ièr, ai agut de novèlas, de bònas novèlas. Mos filhs son a Paris. Trabalhan dins un restaurant. Cercan un ostal per dormir. Mas, sens present a portar al drollet, mon viatge es inutil. »
Los representants de las figurinas, se’n tornan al vilatge, plan moquets e plan somiaires.
Mas de que se passa sus la plaça del vilatge ? Quin rambalh, quin bolegadís, davant l’ostal comunal !
Lo conse es interpelat :  » Mossur lo Conse, reçaupeguèrem las instruccions per Nadal. Las leis Europencas e ecologicas enebisson totes los presents que portan prejudici a l’avenidor de la Terra. Cal servar la biodiversitat, per çò que ne resta. Las ressorgas son pas illimitadas.
Totes las belòias, totes los perfums son forabandits. Los chocolats, los joguets, los libres, los vestits, per far cort totes los presents sont tolerats solament per los drollets.
« _ Caldrà avisar los tres sages, diguèt l’aubergaire !
_ Sul pic, i vau telefonar. » faguèt lo conse.
Es aital qu’aqueste an, coma de costuma los sages, per los Reis, los tres sages vendràn… mas las mans voidas…


……………………………………………………………………………………………
(Mercé a Magui per son tèxte. A fach d’una pèira dos còps :
– Lo mot : Interstici del talhièr de novembre.
– Lo mot : Viralenga del talhièr de decembre
E ieu, ai decidit de lo publicar solet, coma tèxte de Nadal.
)

Ne profièchi per vos desirar un : Bon Nadal a totes

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

trois × cinq =