«  L’important ce n’est pas de gagner mais de participer. »

«  L’important ce n’est pas de gagner mais de participer. »

O sabètz aquela citacion es del baron Pierre de Coubertin qu’es a l’origina de la respelida dels jòcs olimpics modèrnes. Es que voliá dire dins aquela dicha, benlèu un chic enigmatica, que dins la durada Olimpica d’enjòcs n’i a pas brica, que la tòca de l’esfòrç es pas que l’etica de l’espòrt: la corsa sonque per la beutat de la corsa dins d’espròvas de farlabica sens chuc ni muc?
Dins la quita epòca epica de la Grècia antica, per l’elita Elenica cresi pas qu’èra question de venir a Olimpia per cordurar lo camin e far la corsa bartassièra. Los atlètas se mesuravan certas, çò contan, per de recompensas onorificas, coronas d’olivastre o ramas de laurièr, mas ça que la  l’amira èra la victòria, sinonima d’onor e de consideracion.

Pas question de venir per cordurar lo camin e far la corsa bartassièra

Dins aquel temps que vertadièrament Penelòpa fialava, guèrras e lutas fraticidas s’arrestavan, çò dison. Benlèu que Zeus, alassat de totas aquelas garrolhas guerrièras per s’apoderar d’unas sestairadas de mai, impausava de far pache de patz, e probable de paur qu’un dalfin divenc los abrande, la chormalha batalhosa fasiá pauseta.

A l’ora d’ara que lo fuòc celèst es de tota autra mena, dins nòstra èra mediatica que l’imatge es d’argent, s’imagina pas de nos far monstrar l’espectacle patetic d’una clica atletica, de còps pagada a milions, venguda per toristejar o per far de safranièr. Se’n tornar Faní, la palha al cuòl, es vergonha de vergonha (figuratz vos qu’es agut arrivat). Sus aquel sicut n’an sortit un film de comedia, « L’esprit Coubertin ». Dins aqueste film tot espèr nacional de ganhar una medalha resta dins los espleits del sol campion que demòra encara en competicion.

Ailàs, per çò qu’es de far pausa de guèrra, la tan desirada treva sembla fantomatica, mai que mai ipotetica e lo mond contunhan de se metre sul morre sens relambi a grand chaple. Paures davancièrs! Lo sassic olimpic que volguerètz temps de luta cortesa, competicion desinteressada e momenton de patz sembla d’estre remandat a las calendas grègas que question necitge e baujariá avèm de pel monde campions a bèls braçats, lor desiram pas una bona forma olimpica !

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

5 + seize =