Darrièra charradissa de la temporada.
Un pichon retorn sus la nòstra darrièra charradissa de la temporada.
Èra lo dijòus 26 de setembre. Perqué la darrièra ? Perque los corses van tornar començar.
Èrem 6 : Magui, Annie, Josie, Cristian, Sèrgi, e ieu.
Totjorn dins lo cafè : Le local de Somèires. Encara un brave mercé a Nicolas per son bon acuèlh.
Lo nombre de presents es diferent a cada còp. Mas es totjorn ric perque cadun mena çò que pòt per enriquir lo grop.
Los libres del Lector del Val contunhan de virar. Cristian botèt lo contengut del CD en occitan sus una clau U.S.B. e dempuèi s’es multiplicada! Mercé a el, cadun dins sa veitura escota los tèxtes occitans dels uroses ganhants ! Anam comprar lo darrièr libre paregut en 2024.
Los jòcs de Magui : Magui nos faguèt experimentar un novèl jòc qu’adaptèt a l’occitan e a l’environament. Èra lo jòc dels pichons cabals, mas declinat diferentament, amb de prelevaments de cartas a tustas e bustas : una carta d’avarias, e una carta de solucions possibles, que se son adaptadas permeton d’utilizar lo dat un còp de mai e d’avançar lo cabal de fusta un second còp, sul percors, o se que non de demorar sus plaça ! Fabulós.
Seriá plan qu’ane fins a l’edicion de totas sas adaptacions de jòcs collectius, en occitan, que fan trabalhar la lenga : lecturas, discutidas d’un biais agradiu, instructiu e risolièr. Òsca e mercé a Magui !
Lo jòc del daquòs que cal adivinar l’objècte amagat, en pausant de questions, nos faguèt cogitar un brave moment perque èra un objècte d’autrescòps, mas longtemps, longtemps en darrièr…se podiá trobar din la cosina… mas èra pas de metal, ni de plastica, nimai de veire…
Fin finala èra un silex (un gratador) !
Mercé a totes los participants per totes aquestes escambis amistoses, que nos faguèron progressar oralament.
Una pagina rica e agradiva se torna…Benlèu la seguida pendent las vacanças… de Martror ?