« Repair Café » Reparacion Cafè
Un « Repair Café » qu’es aquò ?
Tre l’acuèlh cal emplir una ficha concernant la persona proprietari de l’objècte en pana, que foguèt menat.
Puèi una autra persona pren l’objècte, lo pesa, e fa son inscripcion sul panèl. Un numèro de passatge li es atribuit. Son pes es inscrich sus la ficha numerotada.
Aicí lo talhièr de reparacion d’una bicicleta.
A cada còp qu’una reparacion es acabada, se sona una campaneta e d’aplaudiments fusan. Sorires assegurats per totes. E un objècte de mai qu’acabarà pas sa vida a la rebutariá! Lo reparator concernit va quèrre l’objècte seguent.
Aquí 3 reparators ambe : un lector CD, un fèrre d’alisar e un talhagredons electric.
Aquí 2 reparadors ambe un tornavitz electric e una maleta.
Aquí lo canton de la cordura.
La maquina de cóser ven de Montferrier ambe Nella. Un luòc d’escambis e de conselhs.
Los vestits prenon una segonda vida. Se perlongan, benlèu dins una autra direccion, per una autra utilisacion, una segonda ? o de còps una tresena vida !
De polits encontres tot de long…(E mai per ièu un encontre ambe una occitanista, especialista de las plantas comestiblas e medicinalas ! L’escasença de se tornar veire a l’entor d’una passejada.)
Passatge d’una caissa a sabon ! Umor e recuperacion èran al RdV !
https://www.repaircafe.org/fr/
Reparar amassa, es l’idèa dels « Repair Cafès », doncas, la dintrada es obèrta a totes. Espleches e material son disponibles a l’endrech ont es organizat lo « Repair Cafè », per far totas las reparacions possiblas e imaginablas. Vestits, mòbles, aparelhs electrics, bicicletas, vaissèla, objèctes utils, joguets, e autres. D’autra part son presents dins lo Repair Cafè d’expèrts benevòls, qu’an una coneissença e una competéncia de la reparacion dins totas menas de domenis.
S’i pòrta d’objèctes en marrit estat qu’avèm a l’ostal. E nos metèm a l’obratge amb las gents del mestièr. I a totjorn quicòm a aprene al Repair Cafè. Los qu’an pas res de reparar prenon un cafè o un tè, o ajudan a reparar un objècte apertenent a un autre. S’i pòt tanben totjorn trobar d’idèas a la taula de lectura que prepausa d’obratges sus la reparacion e lo bricolatge.
Aquela video mòstra çò qu’es un Repair Cafè, perqué de benevòls i participan, perqué de visitaires venon amb lors aparelhs en pana, e naturalament : consi tot lo mond pòt fargar son pròpri Repair Cafè.
Bilanç a Galargues aquel jorn :
44 objèctes presentats :
16 objèctes an pogut èsser reparats ;
135 kg son estats salvats de la rebutariá, correspondent a 31 objèctes (reparats o reparables).
Mai de 50 visitaires
Mai d’un visitaire es vengut amb mai d’un objècte.
Los visitaires provenián de mai de 10 vilatges : GALARGUES, CAMPAGNE, Saint HILAIRE de BEAUVOIR, SAUSSINES, MONTFERRIER, QUISSAC, ST BAUZILLE DE MONTMEL, CLARET, VACQUIERES , CORCONNE, ST MATHIEU DE TREVIERS.
36 benevòls èran presents : 21 en reparacion (dont 4 en cordura), 13 animators dont 2 a l’acuèlh.
Desiram particularament mercejar los membres del Repair cafè del Pic Sant Loup que nos acompanhan e nos ajudan a fargar nòstres talhièrs, dempuèi la debuta.
La tièra dels Repairs cafès venents, dins lo canton, foguèt afichada.
La bóstia de mercejaments : Se sèm contents cal pas doblidar « lo capèl » qu’es una bóstia ont se pòt botar una bilheta de mercejaments que servirà pel Repair café seguent.
Foguèt una matinada fòrça agradiva dins un ambient de solidaritat, d’escambis, de trabalh atentiu, d’escota, dins la bona umor. Matinada digna de portar lo nom de Paratge !
(Un sol pichon bemòl (per ièu) : sonque de reparators pas una sola reparatritz ! (exceptat per la cordura ont i aviá pas d’òmes! )
Benlèu dins l’avenidor ?