Ne vos sètz avisats d’aquela? Pendent los jòcs olimpics de Milan-Cortina de 2026 los organizators socitoses del benaise de tota aquela joinessa esportiva, la flor de la disciplina, lor balhèron a posita milierats de preservatius! Los 10 000 que lor porgiguèron foguèron estats manlevats en tres jorns. ( a Paris pendent los jòcs de 2024 n’i aguèt 300 000, siá 2 per cadun per cada jorn).
Quant dison? Saique colhonan? Es que vòl dire qu’a despart de las competicions oficialas se debanan en parallèl, al secret de las cambretas, encontres de freta-monilh coquinet? Que las atletas se tiran la borra dins de partidas de leva cambeta, que se deglendan a l’amagueta dins de competicions de partidetas? Es de bon comprene, per aqueles campions que fan sava, de còps que i a mai cargats que muòla embastada, cal que la pression se desbonde, que se destiben las tensions, que se descabestre la sanqueta, d’un biais coma d’un autre!
D’unes mai o mens avisats i veson l’explica de performanças à la baissa. D’autres, mai o mens assabentats afortisson, al contra, que la produccion de dopamina pòt èsser tras que bona per las melhorar.
Cal pas butar la carrèla de tròp, quichi un pauc, aquela joinessa son pas bagassalha. Una part d’aqueles cauchós olimpics, çò dison, se trapa en venda sus la ret, e a un prètz que còsta! La capòta olimpica dels cinc anèls es collectòr pareis. Que volètz, de còps que i a pagada de pauc ( levat los primièrs quant ganhan los autres?) per aquela joinessa pauc dardenada per se sortir de la palha, per se ganhar las trempas tot fa ventre, (o bas ventre?). Cossí que ne vire, atletas de totas colors, campions de totes païses, qu’aquelas consideracions pecunarias, qu’aqueles divertiments erotics vos foravien pas del objectiu principal vòstre: la tòca primièra es de quilhar au pus naut la bandièra nacionala, de faire pujar a l’acrin l’onor nacional! O doblidetz pas,vos en desiram la bona capitada!