Aquel 5 de Mai passat se debanèt la passejada occitana a Besièrs coma previst. La jornada comencèt de matin per la visita del CIRDOC.
(Centre internacional de recèrca e documentacion occitanas)

Foguèrem aculhits per Cyril GISBERT director de la mediateca que nos expliquèt las missions d’aquel organisme public de vocacion nacionala e internacionala cargat de la salvagarda, de la coneissença e de la promocion de la cultura occitana.

La visita se perseguiguèt, e a aquela ocasion descobriguèrem la mòstra sus las bestias totemicas, en primièr per la descoberta de la riquesa dels documents qu’i son recaptats (CD, DVD, revistas, libres), un fum de documents se pòdon consultar en linha: CIRDOC
Puèi la visita se contunhèt dins las salas d’archius qu’i son contenguts de documents originals a bodre. De tant que n’i a comença d’estre quichat!

Aprèp un picnic agradiu al canton dels poètas, que lo bèl temps èra de la partida,
dins la tantossada faguèrem la passejada dins Besièrs amb lo Sèrgi Boyer. Aquel d’aquí nos menèt per las carrièras en contant l’istòria d’aquela ciutat que tirava sa prosperitat de la vinha. Faguèrem en primièr la visita de la capèla dels penitents blaus, ont s’i pòt veire la maqueta bèla d’un batèl, puèi arribèrem a la comuna. Una visita dins las salas de la comuna nos faguèt veire una exposicion sus d’òbras realisadas per Joan Molin e las pinturas remirablas exposadas dins la sala del conselh.

Enfin acabèrem per la visita de la catedrala Sant Nazari, mièja gleisa, mièg castèl que Sèrgi nos expliquèt sas caracteristicas arquitecturalas e qualques particularitats escondudas que sens el auriam mancat de veire.
Grand mercé a totas e totes, una tras que tras polida jornada, de ne tornar far un fum d’autras coma aquela!