Liure

Soscadissa sus la relativitat de las causas… (Cristina)

Qualques exemples de Problèmas e de Recèptas de remediacion :

• Problèma 1 : Se trobatz que fa freg dins lo vòstre ostal. Per exemple sonque 14 gras…
  Recèpta : Basta de far un pichon torn defòra, plan cobert, sustot se gèla ; per anar quèrre de lenha, per escobar las fuèlhas mòrtas…a pauc près quinze minutas.
  Plan segur qu’al retorn dins lo vòstre ostal trobaretz que i fa fòrça bon ! - Problèma 2 : Aprèp un accident, amb un problèma per exemple, dins lo genolh,,, que necessita cròças, estèla, aprentissatge de las cròças per se desplaçar dins lo corredor de l’ostal, defòra per anar dobrir lo portalh al cap de l’andana. Puèi s’acostumar a la dolor, a l’empechament de far çò qu’aviatz costum de far…demorar immobile alara que tan de causas èran previstas…e aprene la paciencia.
  Veiretz que cada jorn amb l’ajuda del kine, en fasent d’exercicis adaptats…benlèu de còps un pauc doloroses…i aurà una pichoneta amelioracion per se desplaçar e la dolor demesirà…e un jorn, pas pus besonh de cròças, sonque la genolhièra. Mas la dolor, emai s’es demesida, contunha …
  Caldrà aprene la paciencia !
  Recèptas : En cas d’impaciencia…doas recèptas :
  1) Una pregària : dos còps per jorn quand sona l’angèlus : « Santa Paciencia, pregatz per ieu ».
  2) Se l’impaciencia ganha : tornar quèrre las cròças embarradas enaut de l’armari. Fixar l’estèla. E far dos còps l’anar e retorn dins lo corredor de l’ostal…per pas doblidar cossí èra vòstra geina, quand podiatz pas pus pausar lo pè pel sòl.
  Vos promèti que quand tornaretz dins lo vòstre corredor en marchant amb las vòstras doas cambas, seretz fòrça fòrça content dels progresses gigantesques realisats !
• S’avetz d’autres exemples sus aqueste biais de veire las causas per :
  • solucionar l’impaciencia
  • o demesir lo patiment augmentat en causa del vejaire portat suls problèmas encontrats, mercé de nos dire…pòt èsser interessant per cadun de nosautres, un jorn.

N.B. : Benlèu que basta de cambiar son vejaire per èsser mai urós !
Cristina

Lo Viatge de Nadal (Joan-Peire)
 
 Un lapin Lapon,
 Patapim-patapon,
 Se volguèt anar veire,
 Lanlira-lanlèra,
 Jeanòt son cosin
 Cavalet-cavalin,
 Qu'aviá la cauma dels trins.
 Sus"charra-carri"* trapèt
 Cavalin-cavalet,
 Un viatge exprès
 A còsta-non-res,
 Levat que caliá donar la man,
 Patapim-patapam,
 Al vièlh abarbassit
 Que menava la lisa,
 Cotilhon e camisa.
 Mai lèu que l'ulhauç,
 Pè vestit pè descauç,
 Partiguèron sul còp,
 Espardèlha e esclòp,
 Far un torn de planeta.
 Se'n tornèt a l'albeta
Cansat mai que mai,
 Traderin-traderai,
 sens veire lo cosin,
 Pòta e romanin.
 "Fa pas-res, aquò rai",
 Cachavièlha o pantais,
 "Anarai per Pasquetas".
 Diguèt lo lapin.
 
 "charra-carri": revirada personala de "blabla-car"