Pichon retorn sus las Trad’Hivernales

Pichon retorn sus las Trad’Hivernales

Es un festival, que necessitariá un retorn mai grand, mas n’ai pogut seguir sonque una partida !

Dimècres 18 de genièr : Contes amb Marie Coumes

A la mediatèca de Somèires, Marie nos esperava…quieta, en tricotant.
Nos menèt dins lo vilatge, prèp de l’estanc, amb la montanha petita e la montanha nauta, mai luènh, amb la mar darrièr.
Quand Marie conta, vesèm tot. I sèm. Ne volèm pas perdre una sòla mica. Volèm pas mancar lo personatge seguent, qu’apareis sus las mimicas tan expressivas de sa cara. Nimai los pichons bruitatges qu’acompanhan sa venguda.
Èri talament pivelada que n’obliguèri de far una fòto pel blòg ! Los personatges son talament plan descriches, que los vesèm, en plaça, dins lor decòr.
Malgrat lors defauts gròsses, mercé a l’empatia de la contaira los trobam simpatics, ça que la ! Es fòrta !
Al flor e a mesura, nos passejam dins un tròç de la vida de cadun.
Los comportaments caricaturals dels uns, pòdon ajudar los autres, e benlèu los auditors ? a una presa de consciència vertadièra.
La mòrt es polidament descrita…La vesèm al trabalh, tot en delicadesa.
La meteissa delicadesa que la de la contaira per menar son mond ont vòl, ont se dèu anar, a sa bona plaça !
Sus mestres : Henri Gougaud e Catherine Zarcate, podon èsser ufanoses !
Un fòrça polit moment de contes !

Òsca e mercé a Marie Coumes ! Article revirat en francés, oralament en mp3, per la revista : Le Fil. Revista de l’associacion AURAL Montpellier, asso de contaires.


Dijòus 19 de genièr : Cafè òc seguit d’un concèrt, amb lo grop : Saraï
Lo Cafè òc de Somèires, al Jazz Corner Café, èra una charadissa a lor escota. Julièta en gascon. Baltazar en provençal. Amb Sophie qu’es de Belgica, aquò fa una inter compreneson, culturala, dialectala e musicala, de tria.

Lo concèrt : Son tres/Sophie Cavez, Acordeon, Juliette Minvieille percussions e votz, Baltazar Montanaro violon.
Mesa en votz e en musica de tèxtes de femnas. Plaça facha a las trobairises, mas tanben a Loïsa Paulin, Marcela Delpastre e de poetessas comtemporaneas coma Aurèlia Lassaque…Amb una seleccion de poèmas d’amor.
La votz de Julièta, lo vam del trio, la fòrça del tèxtes, nos estrambordèron e emportèron la sala tota ! Sala del Jazz Corner Café, qu’es granda, çaquelà !


Dissabte 21 : per la tantossada/Concèrts Nomades 
Las Salvatjonas :
Despart de l’espaci Lawrence Durell : 1er concèrt amb las Salvatjonas dins la capèla dels Penitents. Cants tradicionals a doas voces : Aelys Loddo e Laurie Alias.
Foguèt un bonaür.

Jérémy Couraut : 2nd concèrt.
Nos esperava al CART, amb son espina, instrument nissard. Coma son dialècte.
Nos faguèt participar per cantar en comunion amb lo vin e aprèp amb lo cocordon ! Un personatge que sèm pas près d’oblidar. Es el que farguèt Djé Baleti. Moment risolièr, agradiu.

Duo Möng : 3n e darrier concèrt.
Lily e Isao. Entre sòm e realitat. Nos fan viatjar dins un mond desconegut que nos sembla conéisser un pauc… mas sustot… endacòm mai…Ont ? Qual o sap ? 
Lily Noroozi: Composition, chant, accordéon, percussions, pad electronique
Isao Bredel Samson: Composition, chant, nyckelharpa, pédales de samples

E ara, una sola enveja : i tornar l’an que ven !

Mercé a Coriandre e a tota la còla de benevòls qu’ajudan.




Laisser un commentaire

Votre adresse e-mail ne sera pas publiée. Les champs obligatoires sont indiqués avec *

un × 4 =