Retorns sus las Trad’ivernalas
La contaira : Malika Verlaguet, lo dimècres 12 de genièr 2022.
Foguèt un bonur d’ausir e d’encontrar Malika, a la Mediatèca de Somèires. Èra lo dimècres, a la fin de la tantossada.
Ja, aviá contat lo matin, a Calvisson, los « contes dels còdols ». Aguèrem un polit retorn lo lendeman, lo dijòus 13, al cafè òc, ont una charadissa èra organizada per Danis Galvièr, a l’entorn dels contes e de la lenga occitana..
http://malikaverlaguet.com/
Per la mai conèisser :
A la mediatèca, nos contèt de contes de Cevenas, collectats per Joan Nadal Pelen. Malika acceptèt de botar en vòtz aquestes contes per l’exposicion de l’Ostal Rotge a Sant Joan del Gard.
Sa creacion artistica nos fa passejar en Cevenas, al mai prigond de l’arbre traucat, mas tanben per en dessús dels monts Aigoal e Mont Lausèra, sus las alas d’una femna aucèl. A travèrs una vitra podèm escotar los contes de la velhada…Malika passa aisidament d’una lenga a l’autra en s’apiejant sus de cants, de provèrbis, de brutatges amb sa boca. Tot son còrs, sos gèstes, son ligats a la bona compreneson de las istòrias qual que siá l’atge o lo nivèl de lenga de cadun. Daissa pas degun sul costat. E los enfants participan fòrça, mas, al bon moment ! Òsca Malika !
La charradissa/escambis, del cafè òc, foguèt a l’entorn dels contes. Una mena de questions/responsas, amb las personas presentas :
Perqué contar en occitan ?
D’ont ven nòstre rapòrt a la lenga ?
Cossí adaptar los contes tradicionals a la cultura e a la lenga d’ara ?
Cossí far amb los contes dels autres pais, d’origina culturala fòrça diferenta ?
Concèrt : Traucanèu, lo dijòus 13 de genièr.
Anne-Lise FOY : vielle à roue, chant ; Camille RAIBAUD : violon ; Tiennet SIMONNIN : cabrette, accordéon
Es un grop de bal auvernhat, amb de borrèias. Mas tanben de cants tradicionals de bals-museta…Ana-lisa nos cantèt dos o tres cants del passat que sembla luènh…mas pas tant qu’aquò, fin finala. Un trio que dona de formigas dejós los pès, e una enveja irresistibla de dançar !
Concerts nomades, lo dissabte 15 de genièr.
Fòrmula ja experimentada, e fòrça presada. Tres grops d’una cinquantena de personas circulan, per rotlament, dins Somèires, amb diferéncia d’ora, amb un guida. S’arrèstan dins cadun dels tres luòcs vodats, ont de musicians los espèran per jogar, e cantar per eles, pendent 20 a 30 minutas. Puèi lo mond caminan pel luòc seguent, mentre qu’un autre grop arriba e s’installa.
Un bonur vertadièr !
1er grop : Duo Sera, a la capèla de las Ursulinas.
2d : Julièta Minvielle, a la Fabrik.
Julièta nos cantèt : Lo melic, Ficatz me lo camp canalhas, …
Darrièr ela, i aviá la projeccion de passatges de « La Strada ». Foguèt remirabla !
3n : Manu Theron, duo amb son grop : Vòtz, al « Jazz Corner Café ».
Las Trads se perlonguèron e s’acabèron lo dissabte 15, al Kedez amb un programa de tria…
(Cocanha, Còr de la Plana, …).
Benlèu que qualqu’un d’autre, (Joan-Pèire ? ), nos farà un polit retorn…Pichon det me diguèt que foguèt coma la cerièra sus la còca ! Un bonur de mai, per acabar las trads de 2022 ! (Cristina)
Mercé a tévèòc, un retorn videò, sus aquestes bons moments :
Un programa de tria, òc ben ! (Joan-Pèire)
D’en primièr comencèt Lo Còr de la Plana amb una cançon de Gasconha, « Nau Gojatas a Castelnau », una guinhada a las doas qu’anavan seguir. Puèi foguèt un fuòc d’artifici amb « Tant deman », e mai que mai quand entamenèron « La Farandola dels Barris ». Una passejada per de luòcs famoses de Marselha e tota la tièra de sos barris e de sos estajans. Ne vos dòni qualqu’unes a tustas e bustas: de Carpiana la caganha, de Sant Antòni lo raca-vòmi, de San Victor la tresusor, las Merlussas del Merlan, de la Calhòla le pecòla, los manja-bacèu de Sant Marcèu, de Castelana los castanhaires. E tanben lo Rocàs Blanc, La Jolieta, Calalonga, los Catalans, los Aigalades, Lumini, Belsunce, Lo Rei d’Espanha, la Capeleta, Santa Marta, Noalha, La Beguda, Montredon, Cadenau, lo mai famós La Plana e ne mancan tot un fum d’autres, ai pas tot pescat, es vrai que siái pas un vertadièr Marselhés e qu’entendi pas tròp lo patoes. Trobarètz çai dejós aquela cançon registrada a Tolosa en 2015.
Lo jòc del mes: la primièra (lo primièr) que nos manda la tièra completa dels barris de Marselha evocats dins La Farandola dels Barris ganha un abonament a gràtis al nòstre blòg escambís en òc. Bona escota!
Venguèron d’autras cançons e lo concert del Còr de La Plana s’acabèt per una polida mazurka ont s’agís de magicians de la manipòla, bon ai pas tot comprés, seguir lo ligam : La Mazurka Mafiosa.
En segonda partida arribèron las dònas de Cocanha.
Agacha que nos mandèron quicòm de bèl ! D’en primièr « Colorina de ròsa » puèi nos faguèron viatjar « Dempuèi Auriac » « Sul Camin de San Jaume » amb « lo Companhon de l’Avairon », e un fum d’autres tanben. Finiguèt de s’acabar amb un forra-borra de borrèias, e nos autres pecaire que nos caliá demorar assetats. E ièu mai que mai qu’aviái pas menar la pega per me tancar lo cuòl sus la cadièra. Un patiment! Bon fin finala avèm caminats per Occitania sens bolegar que n’ai encara los ausidors que tremolan d’aise.
De veire l’article ja escrich sus Cocanha amb lo ligam : Puput
Malaürosament demorèri pas per la tresena partida, pas grèu, las Trad tornaràn l’an que ven, encara mai afortidas !
(Mercé a Joan-Pèire, pel complement d’informacions, per la serada del dissabte 15 de genièr ! (Cristina))