Puput

Puput

Album de Cocanha, grop de femnas que cantan de cançons tradicionalas en polifonia.

Tre la debuta: Suu Camin de Sent Jacques vos invita a dintrar dins un univers d’estransi e de percussions, coma lo fa Carolina Dufau sus la vidèo que foguèt elegida lo melhor clip de la cançon Occitana. Sul camin i bastisson un ostal de parets de lescas de cambajon, de fenèstras de plumas de pavon, de revestiments de ròsas coma lo poiretz veire çai dejós:

Una òbra enfachinaira que contunha al son ritmic dels pès, de las mans, dels tamborins de còrdas (un tom-tom revisitat?) Coma un puput dins sa volada a bassacadas i alatejan las voses. De còps se mesclan docetament per te calinhejar l’ausidor, de còps nautejan per te l’espolsar un bricon, d’autres moments suavas a capela coma dins Beth Aubre que s’acaba sus una partença, una porta se barra… Una anada pels sentiments encontrats dejós una camisa (Colorina de ròsa), a paupa dejós de vestits (Cotelon) o sus un mantel (Janeta), ont la femna i pren la man per aimar, o d’autres còps per desaimar ( la Femna d’un Tambor).

La ritmica bolegadissa vos farà solide capejar au son de las cançons, se que non es que patissètz benlèu d’un torticòli ? Per ne saupre mai de coma se faguèt l’album lo melhor es de las escotar:

Vaqui lo ligam per visitar lor siti : Puput | COCANHA

Devián venir per las Tradivernalas previstas a Someires del 17 al 21 de Març. Per malastre las Tradivernalas se tendràn pas per causa de la COVID. Avèm aqui una pensada pel mond de la cultura e per la còla de Coriandra que se bolegan bravament per nos porgir d’eveniments de tria. Lo regrelh ne serà que mai bèl! Aurem çaquelà l’escasença d’escotar un tròç del progama previst lo disabte 20 de Març à 11H sus www.tradhivernales.com, sus la pagina Facebook « Les Trad’Hivernales » , sus radiò Someires o Radiò Lengadòc (charadissas, concerts en viu). De mancar pas que coma aquò partirem pas Faní!

Damatge per Cocanha que voliái lor demandar quicòm coma lo vos demandi a vosautres: En çò vòstre quand canta lo Puput de que vòl dire, que va plòure o que va far bèl ? Trantalhetz pas per nos mandar las vòstras responsas!

Cocanha, a lèu de vos veire!

Joan-Peire

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

1 × trois =