L’inauguracion dels òrts partejats

L’inauguracion dels òrts partejats

A Galargues (34), dins mon vilatge, i aguèt l’inauguracion dels òrts partejats, lo divendres 15 d’octobre.
Fa d’annadas que l’idèa aviá grelhada. Ara, es concretizada.
La comuna botèt a disposicion un terren municipal que foguèt fòrça trabalhat per desrabar de rasigas prigondas e de romècs… puèi partejat en parcèlas. Lo mond interessats se son senhalats. Una convencion e una charta foguèron elaboradas aprèp concertacion. L’aiga de B.R.L., foguèt menada, mas, èra pas tròp luènh. Tot èra prèst per començar de jardinar, tre la prima darrièra.
E foguèt un bonur de veire pauc a cha pauc la metamorfòsi d’aqueste luòc. Es vengut polit que polit. L’escòla ne gardèt doas parcèlas, pels escolans.

Dempuèi, un desenat de familhas poguèron recoltar de tomatas, de cogordetas, de merinjanas, de flors de tota mena.
Fa una setmana, que las decoracions, sustot dins lo canton reservat per l’escòla, faguèron lor aparicion.
Felician, lo gardian s’es installat per susvelhar tot aquò, dejos son capèl de palha !
Pel sòl, i a de limitacions amb de galets, a coa de lop, que semblan de catarinetas mas de totas las colors. Cada pichon ortalièr escolan a participat a la confeccion de la garlanda de drapèls amb sa fòto enrodada de fruches e de legums !
L’interès d’aqueste afar es una presa de consciéncia ecologica, environamentala,  mas tanben amb de valors de partatge, de cooperacion, e de plan viure amassa. La recompensa es de poder manjar sas pròprias bonas produccions. Ara, demòran sonque qualques pèças de tèrra, pels seguents.

Aprèp lo discors del Conse, Cristina, la contaira occitana del vilatge, contèt lo conte del grand, del gròs, del enòrme rutabagà.


Talament gròs, que lo Papeta lo podiá pas sortir de tèrra.
Mas amb l’ajuda del public, e sustot de la pichona mirgueta, i son arribats.

E cric, e crac, lo conte es acabat…
Mas lo trabalh dels ortalièrs contunha ! Ara, las barraduras contra los singlars.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

4 − 1 =