Nòstra darrièra passejada… e las venentas

Nòstra darrièra passejada… e las venentas

Darrièra passejada, en tres parts :
1)Aspères, 2) capèla sant Julian de Salinelles, 3) castèl de Montredon.
La passejada occitana del 17 de novembre 2021, se debanèt jos un temps ideal !
De bon matin, RdV al Mas Montel per la passejada del « Bois de Paris » (Paris ? Um ! Benlèu « bois de barries » !). D’en primièr : las roïnas de la glèisa romana/Sant Pèire d’Aspères, prèp d’un vièlh cementèri. Foguèt estacada a l’abadiá de Psalmodi. Çò que ne demòra nos ajuda per comprene sa forma e l’emplaçament.
Puèi, marcham prèp d’una jaça amb sas  doas polidas vòltas plan restauradas. Cal marchar encara, sul camin, dins la garriga, puèi, dejós los euses, abans de trobar, ennaut d’un caminòl, lo castelet : datariá del neolitic, puèi venguèt un oppidum gallo-roman.

  • Polida vista sul Pic Sant Lop.
  • Es lo momenton del cafeton !

Se pòt adivinar, en dejós del castelet, dins lo bòsc, l’emplaçament d’una carbonièra, amb la tèrra tota negra ; e de vestiges d’un ostal, de forma redonda, siá l’ostal del carbonièr, siá d’un pastre… Fa pensar a una capitèla.

Seguissèm ennaut per trobar la taula d’orientacion : polida vista, de l’autre costat, fins a la mar.
Sèm a somiar per las passejadas occitanas venentas…Sebastòpol… ?

Puèi la cauna ! Una meravilha. Una rampa preciosa e las lampas benvengudas.
Nos prenèm pel Club dels cinq, mas nos manca lo chin Dagobert !

Retorn al Mas Montel, per la degustacion a la cava dels vins, que serà seguida del picnic.


Mas abans, la nòstra amiga, Chantal, nos congosta d’una visita de tria del bastiment, amb sos comentaris.

La degustacion foguèt un bonur : gost, odors, explicas sus la reconversion en bio que se finalizarà lèu-lèu. Los noms dels vins ? Un poèma : Camp de l’Òste, Psalmodi, Jéricho, Clémence, les Marnes, les Grès, Grenache, Morrastel, …

Lors sitis :
https://www.masgranier.fr/
https://www.masgranierlaboutique.com/

Picnic benvengut, al solelh, aprèp un dezenat de km.  Doblidam pas de charrar en occitan e se pòt constatar los progresses de cadun, d’una passejada a l’autra. Aprèp lo dessèrt, una cançon provençala : « Magali », enregistrada pels ausents, que la nos demandavan.

2a part de la jornada : RdV a la glèisa romana de Salinelles, per tornar trobar dos companhs per la seguida de la jornada. Lo còp que ven, ensajarem d’aver un guida, amb la clau, per ne visitar l’interior.

3a part de la jornada : en rota pel castèl de Montredon, arroïnat, mas ne demòra de vòltas en dejós, ont se pòt circular encara. Ara, nos prenèm pel Clan dels sept !

Damatge que siá pas restaurat abans que siá tròp tard !

5 km de mai…e doncas : 15 km sus la jornada.

Aquesta passejada : i tornarem, mas serà un dissabte, pel mond que trabalhan lo dimècres e pels qu’an pas pogut venir.

Passejadas previstas :

Montpezat e sa grèpia !
https://www.midilibre.fr/2020/12/28/la-creche-racontee-dedouard-peyrille-9280723.php

Fontbouisse ?
Sant Guilhem ?
Pompinhan ?
Claret ?
E ? ….
A vosautres de dire, e… prepausar?

Laisser un commentaire

Votre adresse e-mail ne sera pas publiée.

6 + 3 =