Passejada a sant Bausèli del 21 de Mai

Passejada a sant Bausèli del 21 de Mai

Es dins l’encastre de Total Festum que nòstre menaire Sant Bauselènc nos faguèt la passejada dins son vilatge. Èrem un vintenat de començar lo passa-carrièra pel « Domeni », proprietat d’una familha borgesa que foguèt crompada per la municipalitat.

Cada pauseta èra l’ocasion d’ausir las explicas de Gui a prepaus de la vida del vilatge, quant i aviá de poses, cossí e de qué vivián lo mond e tanben de nos congostar dels contes-devinalhas de Cristina. L’occitan es una lenga que servís per contar totes los contes, e pas sonque las galejadas o los contes risolièrs !

– Lo primièr conte èra plan un conte-devinalha mas sustot un conte d’avertiment, per alunhar los enfants del dangièr del potz. Tèma ancestral.
A prepaus d’aquel conte, es que sabètz perqué cada còp qu’anatz quèrre d’aiga al potz vos cal prene un miralhet? La responsa a la perfin de l’article quand auretz pro manjat de favas.

Faguèrem una virada pel potz comunal que foguèt una amelioracion de las gròssas de la vida dels estajants. Lo segond conte prèp de l’auberador, èra un conte de sapiença: lo mond que trapam sembla fòrça a lo que tenem dins nòstre còr. Puèi visitèrem lo lavador bastit en 1915 que serviguèt sonque qualques annadas fins qu’arribèt l’aiga dins las fonts del vilatge. Cristina nos contèt una istòria vertadièra sus las bugadièras d’un còp èra, e sustot sus las bugadièras de Grabèls, que faguèron un trabalh de tria pendent tres segles. Salvèron l’economia del vilatge pendent las guèrras de religion, pendent las crisis viticòlas….en fasent la bugada pels borgeses de Montpelhièr.

Seguissèm nòstre camin, passèrem per aquela mòla qu’a servat son ais de fusta. Nos expliquèt Gui qu’èra la mòla d’un molin d’oliu e non pas de blat. Un pauc mai luènh, lo passatge dins una carrièra estrecha foguèt lo moment d’ausir Cristina dins una galejada tradicionala, que nos ven de las facecias de Nasreddin…

Puèi acabèrem per la gleisa e lo temple, un dels mai pichòts de França. Dins aquestes vilatges de l’est d’Erau pendent las guèrras de religion, Catolics e Uganauds se carpinhèron pendent d’annadas.

Dins la glèisa, un conte chinès, que lo tèma faguèt lo torn del mond : las promessas non tengudas e las consequéncias que ne resultan, dins lo temple, un conte italian sul bonur de la vida e tota sa filosofia acabèron aquela passejada.
Mercé a Gui de far de plaça als contes, en occitan, dins una passejada patrimòni.
Cristina, la contaira, merceja calurosament los auditors per lor granda atencion e lor participacion activa. Son associacion de contaires : AURAL, Montpelhièr vos prepausa doas causas mai que mai en francés e tot es a gratis  :
Contes sous les étoiles à Buzignargues, le 10 juin, à 20h30 : Contes sous les Etoiles
Fête du conte, à Assas, le 25 juin, toute le journée : Fête du Conte
Encara una polida passejada dins nòstra biaça! Mercé a Cristina e Gui.
En mai d’aquò aguèrem l’astre d’ausir Marijò de la corala Nadalenca e Jaume de la corala del Cocut nos cantar dins lo lavador la benvenguda cançon de nòu de la Bugada e dins lo temple la cançon de la Confession, un plaser pels ausidors. Marijò nos fa saupre que la corala Nadalenca serà en concert lo 7 de Junh a Montpelhièr.
Çai aprèp lo ligam: Concert Nadalenca, mercé plan tanben a totes dos.


Aquí tornam a la devinalha, perqué a cada còp qu’anatz quèrre d’aiga al potz vos cal prene un miralhet? Per la responsa avètz pas que de venir far las passejadas, e…rau, passa que t’ai vist! (non galeji se volètz la responsa avètz pas que de mandar un messatge a bonjorn@escambisenoc.org o quitar un comentari)

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

cinq − 3 =