Caulet lactofermentat
Se sap plan que la coseson destruís las vitaminas e oligo-elements dels aliments, lo mai es cuèch lo mens i a de vitaminas. Donc es bon per la santat de manjar qualques saladas a cada repais. Mas pendant l’ivèrn i a pas un fum de legums de manjar cruses. Carròtas, rafes, naves, naps, rafes negres, cogordas raspats amb d’espinacs e saladas d’ivèrn fan un bon plat crus mas es rapidament un aboriment per las papilhas.
E mai, per exemple lo caulet es de mal digerir crus. Donc cossí far tornar la fantasia dins la sieta ?
La lactfermentacion es una opcion per aportar de gost diferent e original a un plat. Evidentament, tot lo mond coneis la chocrota, mas l’avetz ja utilisada cruda amb de rasins secs e de tròces de poma ? Es plan bon vos pòdi dire.
Los avantatges de la lactofermentacion
- Es un biais de conservar lo legum sens lo coire
- Es mai digèste e assimilable
- Dins los legums lactofermentats, i a mai d’enzimes, de vitaminas, e d’antioxidants que dins los legums cruses (per ieu aquò es extraordinari !)
- Es una sorga de probiotics
- Es bon pel transit intestinal
- Es rapid e simple de faire, gostós e sanitós
Impossible de s’empoisonar, se la preparacion pudís ==> pobèla…
Caulet chinés (pet-tsai) lactofermentat
D’en premièr far l’aiga-sal : far bolhir un litre d’aiga, daissar refrescar e apondre 30 g de sal gròs.
Esterilizar un bocal o dos. Vos cal elegir de bocals ont es possible de botar quicòm dedins per far un pes sus la preparacion (utilisi un bocal mai pichòt o un veire).
Ingredients
- 1 caulet gròs
- 4 cebas
- 4 gossas d’alh
- 1 culhieron de cafè de coriandre e una autra de romanin
- Raspar fin lo caulet amb la mandolina, botar dins un saladièr e cobrir d’aiga-sal, daissar una nuèch,
- lo lendeman amenudar las cebas e l’alh
- lavar lo caulet dins una passadoira per levar la sal, gardar un pauc d’aiga-sal
- mesclar tot dins lo saladièr
- botar dins un bocal en quichant fòrt per far sortir tot l’aire
- quand lo bocal es plen susvelhar que lo caulet es dejós son chuc, es possible d’apondre d’aiga-sal quand i a pas sufisament de chuc
- botar un bocal/veire comol d’aiga dessús
- daissar 1 jorn a temperatura ambienta,
- e finalament tapar lo bocal,
- daissar dins un cabinet al mens 15 jorns avant de tastar.
Se mescla amb la salada o a despart sus la sieta, es necessari de s’acostumar al gost de la lactofermentacion que pòt semblar estranh a la debuta…
Es possible de far de lactofermentacion amb de caulet frisat, caulet roge, bledaraba, carròtas, naves, cornissons ecò ecò…
2 réflexions sur « Caulet lactofermentat »
Mercé de nos prepausar de recèptas qu’ajudan a èsser en bona santat ! E aquò, amb totjorn ton atencion costumièra pel gost !
Òsca !
Cristina
Mercé Cristina, uèi se pot imprimir 😉