La Petanca celèsta

La Petanca celèsta

Quand partiguèt la fusada al mes de Novembre 2021 s’agissiá pas de se mancar, de far la « masanca* », coma o disiam a la petanca d’un (o d’una) tiraire que mancava las bòchas que non pus, que t’auriá pas desquilhat un ase dins un corredor. Non, s’agissiá pas tanpauc de tirar a rabaleta, de portar la bòcha o de venir docetament tetar lo lé! L’amira èra de tustar plen fèrre, de quichar un carrèu a 11 millions de Km de la tèrra. La NASA faguèt mèfi que lo projècte faguèsse pas chic, analisar las trajectòrias, ajustar lo tir, e aquò foguèt una capitada de pas creire: Lo 26 de Setembre 2022 la sonda DART s’espotiguèt sus l’asteroïde Dimòrphos.

Aqueste d’aquí èra benlèu un dangièr per la nòstra planeta blava, que benlèu l’auriam recebut sus la clòsca? Que non pas, simpla repeticion! La tòca vertadièra èra de veire se podèm cambiar lo caminament d’un asteroïd. La NASA es a espepissar aquel espotiment, coma aquò dins los sègles venents poiràn aparar nòstra pèrla de l’univèrs per la sauvar de la meteissa mauparada que causèt la disparicion dels Dinosaures.
Diable dins qualques sègles! D’aicí d’ailà aurem lèu fach de lo far petar nòstre calhau qu’avèm besonh de degun d’autre per o far!

*Masanca: o mencioni de memòri, siái pas segur de l’ortografia, e l’ai pas trapat sus mos diccionaris. Se una o un saberut de la lenga me pòdon donar d’entresenhas aquí dessús cal pas trantalhar de quitar un comentari.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

5 × 3 =