L’ABC del saber, revista umila e AMBICIOSA
Article : Eric Fraj (lengadocian)
Quand pareguèt lo numèro 1 de L’ABC del saber, en febrièr de 2023, d’unas e d’unes se pensèron bensai qu’una revista suplementària fasiá pas mestièr a l’occitanisme. Mas se gaitam lo panorama de las publicacions occitanofònas de dos ans fa, nos mainam qu’i mancava quicòm d’importància: una revista que parlèsse de tot, fòra l’occitanisme. De tot, es a dire dels grands problèmas e de las questions màgers de l’epòca, de l’imaginari e de las practicas inedits d’un mond cambavirat . Non cregatz pas que la manca d’una tala revista la revelèt un estudi de mercat. L’idèa me’n venguèt d’un sentiment de frustracion: per n’apréner suls eveniments e las interrogacions de uèi, perqué èsser obligat de legir la premsa francofòna, ispanofòna o anglofòna? Una revista occitanofòna poiriá pas far l’afar?
Ne parlèri a Anne-Pierre Darrées, que ne parlèt al C. A. de las edicions Reclams. S’agissiá d’una publicacion tematica annadièra. Tematica per se poder concentrar sus un sicut e l’aprigondir. Annadièra perque cal plan un an per trobar títol, format de la revista, comitat de redaccion, s’acordar sul tèma e las causidas lingüisticas, soscar als angles d’ataca mai aciuts , cercar de collaboracions, legir e gerir los articles prepausats, pensar al grafisme, a las illustracions, etc. En mai de la revista, i aviá un site correspondent per i metre d’autres articles . L’idèa agradèt, la causa foguèt temptada. L’actualitat nos porgiguèt lo tèma: la guèrra.
Lo numèro inaugural (110 paginas) foguèt un succès . Lo monde èran positivament estonats de la qualitat de l’ensemble, de son caractèr fòrça professional. D’efièit, podèm comptar amb lo talent d’un especialista de la composicion, Gilles Conte, e lo d’una imprimariá navarresa de granda qualitat. Aquò nos permetèt de beneficiar de la difusion assegurada per Cairn. Plaguèt tanben la preséncia d’articles en catalan, en provençal, en gascon e en lengadocian. S’obrir als catalanofònes èra una evidéncia, rapòrt a la proximitat amb Catalonha, coma marcava de se que la revista presentèsse un minimum de pan-occitanitat. Nascuda gascona, la revista s’òbre a l’autre. Dins aquesta mira cada article (exceptat lo dossièr, mai long) s’acompanha d’un resumit en francés e d’un autre en anglés. Se parla pas d’occitanisme, L’ABC del saber non s’adreça sonque als occitanistas e als catalanistas, mas a un maximum de monde. Aquí una de nòstras doas ambicions. L’autra es de balhar de qué aprendre e soscar, de mercé a la qualitat e a la pluralitat dels articles. Mas lo comitat de redaccion es reduit e sèm pas omniscient·a·s: embaucham de monde qualificats, coma faguèt Jaume Jaussaud dins lo numèro 2 (febrièr de 2024), consacrat a l’energia. Aquí es la nòstra umilitat: conéisser sos limits e saber delegar, escotar remarcas e criticas per tornar escriure sa copia, acceptar la fòrça del collectiu.
Lo segond numèro capitèt tanben e ne sèm ara al tresen, Umans, tròp umans?, ric e polit, amb pel primièr còp de tèxtes de creacion actuals. Fraita de poder analisar totas las facietas del fenomèn uman (prètzfait sense fin e fòra de nòstras competéncias), nos i contentam d’enonciar lo pròpri de l’uman e d’esclairar qualques aspèctes essencials de son rapòrt actual a l’alteritat, la qu’es en el coma dins l’autre, la del animal, de la biosfèra, del grand Tot. De l’evolucion biologica a l’I. A. e al transumanisme, en passant per la fòrça del mite, lo lengatge, la question de la discapacitat o l’experiéncia del devegèr, lo numèro examina un quinzenat de realitats umanas de primièr òrdre, totjorn dins una volontat espinozista de “Ni rire, ni plorar, [mas] comprendre”.
Aquò dit, demòra que per despassar lo succès dels numèros precedents, e per perennizar la revista, nos cal ganhar una batalha essenciala: la de l’informacion. Es aquí que, al delà del nucli que sèm, podètz intervenir, decisivament. Es lo nòstre espèr.
Una de las consequéncias d’aquel succès es que la revista passèt d’un a tres entitats subvencionairas. Ara l’ajudan financièrament lo Conselh departamental dels Pirenèus Atlantics, lo Conselh regional de Novèla Aquitània e lo Conselh departamental dels Pirenèus Naut
Per anar sul site : https://abcdelsaber.fr/
Lo ligam remanda a l’ABC en linha amb de complements que pòdon paréisser après la sortida de la revista papièr.
La revista còsta 19 euros mai 3 de fraissas de mandadís.
En linha:
=> sul site www.reclams.org
=>puèi clicar sus « LE CATALOGUE » ont la revista aparéis al mièg d’autres libres.
Òctele nos presenta la revista :
(ÒC) Las edicions Reclams, geridas per l’Escòla Gaston Fèbus, que sorteishen d’aviar ua navèra revista annau d’un centenat de pajas : l’ABC del Saber. Eric Fraj, lo cap redactor, e Anne-Pierre Darrées, la responsable editoriau, que’ns parla d’aqueth purmèr numerò sus la guèrra.
Mercé a Joaquim Blasco per sa proposicion e son ajuda per aqueste article.
Es un plaser de presentar una revista de tria !
One thought on “L’ABC del saber, revista umila e AMBICIOSA”
Òsca per tot aquò Potons