L’error
L’ Error
Tras de l’asuelh
Quand lo solelh
Fa quincanèla,
Qu’a jorn falit
Lo clar trampela,
Fan coma aimi,
Quand d’un tròç de cèl
Fa l’enfuòcaire,
D’un ser docinèl
L’embelinaire,
E de tos uèlhs
L’enluminaire.
Joan-Peire
De mancar pas : Leonia e Ricon lo triton (episòdi 9)
De mancar pas : Leonia e « Ricou » lo triton (episòdi 9)
https://www.leoniemmeherisson.com/2021/05/29/leonia-e-lo-triton-9/
« Dins aqueste episòdi, Leònia rescontra un estatjant de la lavanha… Avant de tornar dormir s’arrèsta beure un còp e un dragonet sortis de l’aiga ! E òc i a de dragonets dins las lavanhas ! Bon enfin, es un triton. Li va contar cossi se passa la vida dels tritons dins la lavanha, lors amors, la mangisca, lor vida tot simplament.
La Plovina
La Plovina
Demòra un sàssic penjadissa
Au nas d’una fuelha plegadissa,
Beluguejanta fa sas espèrras
Conflada d’una lutz darrièra.
Promessa de vida, tomba leugièra
Dessús la polsa cambiadissa
Per ne far fanga noiriguièra.
Joan-Pèire
Haikus e aquarella
Mercé a Catarina E., per son haiku. Se n’avètz, trantalhatz pas per los nos mandar :
bonjorn@escambisenoc.org
L’Aureta
L’Aureta
Sabi una font
Qu’i es venguda,
Ras d’una flor
Quitèt una pluma.
Faguèt flatinga
A l’ala d’un capèu,
Puèi es partida
Sus la de l’aucèu.
Joan-Peire
Plantas : omenatge a Venus
Lo capelet, o lo monilh de Venus
Planta vivaça, regorgada d’aiga.
Aima los luòcs a l’ombra.
Se pòt manjar en ensalada.
La lavar, e s’entresenhar abans.
Lo penche de Venus
Involucèlas a 5 foliòlas ; grelha en bordura dels camins.
Lo capelet de Venus o Lo monilh de Venus 
Lo penche de Venus 
Omenatge a la natura
Haïkus e Mokis
Haïkus/Mokis
Lo Haïku es : un Poèma cort, de 3 verses, de 5/7/5 sillabas.(5 lo primièr, 7 lo segond, 5, lo tresen.)
Dèu parlar de la sason o d’un moment particular.
Se que non, es un moki o un haïku liure.
Se n’avètz de prepausar : Òsca e mercé.
Ensajarem de los publicar.
« Remolin d’aiga,
Fresilhament dins l’èrba,
Ninfa passeja. »
Cris.
Poèma afficha aquarellat
Te vòli dire
Te vòli dire que me manca Totjorn mai lo caudet de ton còs. Pausar la man sus tas ancas Non pas jamai n'aurai de tròp. Es pas de creire pòdi pas pus Mai me passar, es pas messorga, Del frescolet de ta boca Onte veni beure ton buf. Te vòli dire coma me dòl Quand pòdi pas pausar aquel tròç De fresc raubat de cap de pòt Dessús lo perfum de ton còl. M'avisèri qu'i es amagat Dins un recantonet de suau Un bocin de solelh plegat Sus lo lis de ta pèl pan caud. Te vòli dire coma encara Del patiment ne veni pròche Quand ton agach se mascara Que'n davala un pauc de pluòja. Sembla pas vrai coma me cofla Encara pas, aquò's vertat, De passar los dets pel mofle De tos peus longs embartassats. Te vòli dire que m'embriaga De mai endralhar man dins ta man Una nòva caminada Se amassa anam cap a deman. Me pòdes creire, riscam pas-res De s'embroncar sus la dralhòla, Se un brave jorn tiram pas drech, Lo braç fasent la talhòla. Avèm ja vist qu'a cada còp Que nos enanèrem en tropa Onte que menèt la rota Un mai un foguèt pas de tròp. Te vòli dire coquin de sòrt Pas ges de paur, pas ges de dobte Quand ven michanta la rota A quatre pès i sèm mai fòrts. Joan-Peire 21 de Març jornada mondiala de la poesia, n'escribètz? Las podètz mandar!
Dos libres : « EU », e «Negrelum » de Miquèla Stenta
Veni de legir : EU, de Miquèla Stenta. Es un bonur per ieu de trobar aqueste libre, en seguida a la lectura de Negrelum. (Editor : L’Aucèu Libre)
Ja, per Negrelum foguèri suspresa per l’autora. Enfin, aviái finit per trobar qualqu’un que gausa parlar d’un biais vertadièr, (e sens pas ges d’eufemismes), de çò que son los darrièrs moments de la vida. Sens pas res amagar de la vida vidanta. En occitan, avèm totjorn sonat un gat, un gat ! Benlèu qu’es mai delicat de téner aqueste parlar, quand se tracta de la seuna de maire. E sustot lo jorn ont devenèm los paires dels nòstres paires que son dependents de nosautres coma s’èran devenguts los nòstres enfants ! En mai d’aquò, coma ditz Miquèla : « Cal tener lo còrs que s’escapa. »
E aprèp lor despart, nos demòra de far un trabalh de memòria, prigond e respectuós.
Testimòni : Mercé a Miquèla Stenta per aqueste libreton que m’ajudèt fòrça pendent lo primièr confinhament, ont ai fach un trabalh d’acompanhament, pendent un mes, al prèp de ma maire, que tomba ara, de mai en mai, dins una dependéncia prigonda.
Per ieu, aqueste libre, es una pepita !
Ara, lo libre : « EU », me sembla una mena de resson, de complement de Negrelum, un pauc coma un miralh de doas fàcias.
Miquèla nos ditz qu’es « un prètzfach d’arqueologia memoriala ». Tre la debuta, nos fasèm un image dels personatges a travers la dicha de las fòtos.
Descripcions cortetas acompanhadas de còps de qualques poèmas que nos permeton de completar las nòstras representacions a nòstre agrat.
Poèmas remirables qu’apondon colors, bruches, odors, prèp de l’estanh ; mas que nos desplaçan tanben dins l’espaci e lo temps. Lo retrach d’EU se dessenha a flor e a mesura dels racontes de sa vida vidanta.
Editor : l’Aucèu Libre/
Se ne volètz crompar, vos aconselhi los dos d’un còp.
Coma lo ditz Joan-Lois Blenet dins sa Cronica occitana del 21 de febrièr : Aquestes libres, editats per l’Aucèu Libre, « fan gaireben la talha d’un telefonet »
« Melhora alternativa, al pivelatge d’internet que nos clava de tròp. »
http://lauceulibre.com/?q=node/2
Retorn sus legidas : Paraulas de Hemnas
(De legir, de crompar, de porgir, abans lo 8 de març*, jornada de la femna ; se que non per lo 8 de març, de l’annada seguenta, o per una autra escasença !)
Mercé a Paulina Kamakine, qu’a corrut totes los camins de Tèrra d’Òc per encontrar 36 poetessas occitanas.
A prés lo temps d’escotar caduna, per nos ne far un pichon retrach, fidèl, prigond e condensat. Aquesta antologia es presentada dins totes los dialèctes ; e en bilingüe, per ne facilitar la compreneson per totes.
ADRIANA ABELLO – LUCIA ABELLO – SORETA ALLARD – LOU PETÌT AUSÈTH – MARILENA BELTRAMO – SILVIA BERGER – MAGALÍ BIZOT DARGENT – BENEDICTA BONNET – NADINA BORGÉS – TERÈSA CANET – ESTELLO CECCARINI – CECILA CHAPDUELH – AMY CROS – DANIELA DAO ORMENA – DOMENJA DECAMPS – FRANCESCA DUDÒNHON – TÒNI ESCALA – DANIÈLA ESTÈBE HOURSIANGOU – MAYO FEUGAS – GENEVIÈVA GALLEGO – TIZIANA GALLIAN – JOSÍ GUILHÒT – CATERINA GIUSIANO – LISA GRÒS – NICÒLA LAPORTE – AURELIÀ LASSACA – SARA LAURENÇ ZURAWCZAK – EMILIANA LAVIGNE – OLGA MARTINO – MARINETA MAZOYER – BRIGITA MIREMONT ORAZIO – TRESIÀ PAMBRUN – TIZIANA RAINA – CATERINA RAMONDA – LILIANA ZAND – ZINE
Çai-jós la video, per escotar qualquas poetessas.
Per mai conèisser Paulina Kamakine : clicar sus la fòto o sul ligam, çai-jós.
http://escolagastonfebus.com/paulina-kamakine/
Lo ligam per comandar l’Antologia*, en cò de Reclams :
http://reclams.org/fr/catalogue/nouveautes/produit/124-paraulas-de-hemnas
*Aquesta antologia me sembla un polit present per totes los que penson que la jornada de la femna (del 8 de març) deuriá durar tota l’annada !