De Quala color ?

De Quala color ?

Sai que seriá pas de negre				
Coma grana de sambuc,
Mas de la de la persèga
Que n’a la doçor del chuc?
Benlèu de la del blavet
Tal bocinèl de cèl blós,
Tant lo sembla bèure a galet
Quand clantís son rire gaujós?
Es qu’es color del jansemin
Que sa pèl n’a la nolença,
Qu’es son perfum qu’a la perfin
Me demòrra a sa partença ?
De la d’una flor de tapèra
Que de l’aspre d’un boton
Ven florir entre las peiras
Del mai bèl qu’en èla escond ?
D’èl que n’es lo simbòl bèl,
Es qu’es de la d’una ròsa
Coma sa boca que ven mèl
Tre que ma pòta s’i pausa?
Es qu’es color d’arcaneta 
Coma sa gauta de velós,
Del pallinèl de sas tetas
Que m’encigala lo gost?
Coma espiga de plen camp
E rosèla de l’aurièra
Que quand se mesclan en ersejant			
Fan s’enlusir la pradèla,					
Quand espelís pel jorn grand				
Coma al secret de l’ombrièra				
Es que fan los dos en s’esposant
S’espandir color novèla?
Es qu’a l’encòp sorn e clar				
De mantas colors floreja					
Coma arc-de-seda dins lo larg,				
Pluòja e solelh mièja-mièja?							
Es que ten del tendre mescladís
D’aiga suava e de fuòc viu,
Que fa tal coma lo lum
Miralhar la color bèla
De sos uòlhs coma estellum
Dins lo jorn d’una candèla ?
Es qu’es color del mirgalhadís
Que lusís jos sa parpèla
Que fa que son agach ven cèl
De matin quand s’esparpèla,
Que fa qu’es totjorn temps bèl,
Qu’es la prima a l’entorn d’èla ?

Tu que n’ès la messatgièra
La mai fineta bandièra
Diga me embelinaira flor
Quala es la color de l’amor ?


Joan-Peire lo 14 de Febrièr 2023

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

cinq × 4 =